Salmo 107:1-43
107 ¡Rü moxẽ nüxna pexãgü ya Cori! Erü nüma rü namecüma rü norü ngechaü̃ rü taguma inayacua̱x.
2 107:2-3 Rü ngẽxgumarüxü̃ ta rü name nixĩ i Tupanana moxẽ naxãgü i guxü̃ma i ngẽma duü̃xü̃gü ga norü uanügüme̱xẽwa Cori ínguxü̃xẽẽ̱xü̃. Erü nümagü rü ngexta ínawoonexü̃wa ga nórchiwa rü súwa rü léstewa rü oéstewa rü Tupana rü wena nananutaque̱xexẽxẽ rü nachixü̃aneca̱x nanawoeguxẽxẽ.
3 Nüü̃ nadau 107:2
4 Rü nümagü rü ínachianexü̃wa ga ngextá taxúema ixãpataxü̃wa nachopetü nax naxca̱x nadaugüxü̃ca̱x ga wüxi ga ĩane ga nagu naxãchiü̃güne. Notürü ínatüe rü tama nüxü̃ inayangaugü ga nama ga wüxi ga ĩanewa nadaxü̃.
5 Rü yexguma yema namaca̱x nadaugügu rü nataiyae rü nita̱xawae. Rü yemaca̱x naturae rü yexma nayuechaü̃.
6 Notürü yema nax ngúxü̃ yangegüxü̃gagu rü düxwa Cori ya Tupanana nacagüe. Rü nüma ya Tupana rü ínananguxü̃xẽxẽ nawa ga yema norü i̱xãchiãẽgü.
7 Rü yemawena rü mexü̃ ga namagu nayamugü nax nawa nangugüxü̃ca̱x ga guma ĩane ga nagu tá naxãchiü̃güne.
8 Rü name nixĩ i Cori ya Tupanana moxẽ naxãgü naxca̱x i norü ngechaü̃ rü norü ngü̃xẽẽ i nüxna naxãxü̃.
9 Erü nüma rü tüxü̃ naxaxexẽxẽ ya yíxema ita̱xawaxe rü taxü̃ i õna tüxna naxã ya yíxema taiyaxe.
10 107:10-11 Rü yema duü̃xü̃gü rü poraãcü chixexü̃wa namaxẽ rü ngẽmagagu nhama ẽanexü̃wa nangexmagüxü̃rüxü̃ nixĩgü. Rü ngẽma norü chixexü̃ rü nayana̱i̱xgü nhama curẽchimaxã yana̱i̱xgüxü̃rüxü̃. Rü nanaxĩ̱xãchiãẽgü yerü tama naga naxĩnüechaü̃ ga Cori ya Tupana, rü tama nanaxügüchaü̃ ga yema nüma nagu naxĩnüxü̃.
11 Nüü̃ nadau 107:10
12 Rü yemaca̱x ga Tupana rü taxü̃ ga puracüwa nanawogü. Rü naxwetaarü yamaxã nayayitanü rü taxúema nüxü̃ tarüngü̃xẽẽ.
13 Notürü yema nax ngúxü̃ yangegüxü̃gagu rü düxwa Cori ya Tupanana nacagüe. Rü nüma ga Cori ya Tupana rü yema norü guxchaxü̃wa ínananguxü̃xẽxẽ.
14 Rü yema taxü̃ ga guxchaxü̃wa ínananguxü̃xẽxẽ nhama ẽanexü̃wa ínanguxü̃xẽẽãxü̃rüxü̃. Rü nüxü̃́ nanamexẽxẽ ga yema norü guxchaxü̃gü nhama curẽchi íyawegüãxü̃rüxü̃.
15 Rü name nixĩ i Cori ya Tupanana moxẽ pexãgü naxca̱x i norü ngechaü̃ rü norü ngü̃xẽẽ i pexna naxãxü̃.
16 Yerü nüma rü nayapuxẽxẽ ga yema poxcupataü̃arü ĩã̱x ga brṍchenaxca̱x rü nanapuxãchixẽxẽ ga yema norü férumena̱xãgü.
17 107:17-18 Rü nümagü i ngẽma duü̃xü̃gü ga norü chixexü̃gagu rü norü pecádugügagu ida̱xaweexü̃, rü nanaxĩ̱xãchiãẽgü. Rü woo ga yema norü õnagü rü tama nüxü̃́ nachixégagü yerü naturae rü marü nayuechaü̃.
18 Nüü̃ nadau 107:17
19 Notürü naétüwa ga yema norü guxchaxü̃gü rü Cori ya Tupanana nacagüe. Rü nüma ga Cori ya Tupana rü yema norü guxchaxü̃wa ínananguxü̃xẽxẽ.
20 Rü namaxã nanaxuegu nax naxca̱x yataanegüxü̃. Rü naxca̱x nitaanegü. Rü yemaacü ga Tupana rü yuwa ínananguxü̃xẽxẽ ga yema duü̃xü̃gü.
21 Rü name nixĩ i Cori ya Tupanana moxẽ pexãgü naxca̱x i norü ngechaü̃ rü norü ngü̃xẽẽ i pexna naxãxü̃.
22 Rü name nixĩ i nüxü̃ pecua̱xüü̃güãcüma moxẽ nüxna pexãgü rü taãxẽãcü nüxü̃ pexugüchiga i ngẽma mexü̃gü i naxüxü̃.
23 Rü yema taxetanüxü̃gü ga márgu yarüxĩĩxü̃xü̃, rü yáxü̃wa naxĩ nagu ga norü wapurugü.
24 Rü yema már-arü ngãxü̃tüwa nüxü̃ nadaugü ga yema mexü̃ ga Cori ya Tupana üxü̃.
25 Rü nüma ga Cori ya Tupana rü nanamu nax inaxüxü̃ca̱x ga buanecü rü yexguma rü tacü ga yuape inaxü.
26 Rü yexguma ga guma wapurugü rü poraãcü naxexnagütanüãxü̃ rü narüyiixü̃gü. Rü yema nagu ĩxü̃ rü nidu̱xru̱xe norü muü̃maxã.
27 Rü nichü̱xatanücüxü nhama nangãxẽxü̃rüxü̃. Rü tama nüxü̃ nacua̱x nax nhuxãcü íyachaxãchixẽẽgüãxü̃ ga norü wapurugü.
28 Notürü yema guxchaxü̃wa nayexmagügu rü Cori ya Tupanana nacagüe, rü nüma ga Cori ya Tupana rü yema norü guxchaxü̃wa ínananguxü̃xẽxẽ.
29 Rü gumá buanecü ga tacü rü íxracü ga buanecüxü̃ nananguxuchixẽxẽ, rü narüxo ga yuape.
30 Rü yexguma nüxü̃ nadaugügu ga nax naxoxü̃ ga gumá yuape rü nataãxẽgü. Rü Tupana rü yema ínaxĩxü̃wa nanangugüxẽxẽ.
31 Rü ngẽma duü̃xü̃gü rü name nixĩ i Cori ya Tupanana moxẽ naxãgü naxca̱x i norü ngechaü̃ rü norü ngü̃xẽẽ i nüxna naxãxü̃.
32 Rü name nixĩ i moxẽ nüxna naxãgü i duü̃xü̃güarü ngutaque̱xewa rü ãẽ̱xgacügüarü ngutaque̱xewa.
33 Rü nüma ya Cori ya Tupana rü nayachegüxẽxẽ i natügü rü natüxacügü, rü naxnecümarexü̃ nayanguxuchixẽxẽ, rü nipagüane.
34 Rü ngẽma waixümü i nanetü nawa bacaxü̃ rü Tupana rü mairaxü̃ i chixexü̃xü̃ nananguxuchixẽxẽ nagagu i norü chixexü̃ i ngẽma duü̃xü̃gü i nagu ãchiü̃güxü̃.
35 Notürü ngẽma naane i taguma dexáã́xü̃ rü naxtaxaacügü nawa nayanguxuchixẽxẽ. Rü ngẽma naane i pagüanexü̃ rü niburaweã̱x.
36 Rü ngẽxma tüxü̃ namugü ya yíxema ingearü ngẽmaxü̃ã́xe. Rü ngẽxma tümaarü ĩanegü taxügü.
37 Rü ngẽxma tixüanegü rü úwamaxã tatoegü rü muxũchixü̃ma i tümanetüarü o tibuxgü.
38 Rü nüma ya Cori ya Tupana rü tüxü̃ narüngü̃xẽẽ nax timuxü̃ca̱x. Rü nayamuxẽxẽ i tümaarü wocagü.
39 107:39-40 Rü ngẽxguma tümaarü uanügü chixri tümamaxã icua̱xgügu rü ngúxü̃ tüxü̃ yangexẽẽgügu rü ngẽmagagu tiyuetanü rü tinoxreetanü, notürü Tupana rü tá tüxü̃ naxütanü rü tá nüxü̃ naxoo̱x i ngẽma tümaarü uanügü. Rü ínachianexü̃gu tá ínayatüexẽxẽ nax nu ne naxĩmarexü̃ca̱x i norü uanügü.
40 Nüü̃ nadau 107:39
41 Rü yíxema ingearü ngẽmaxü̃ã̱xgüxe rü nüma ya Cori ya Tupana rü tüxü̃ ínanguxü̃xẽxẽ nawa i tümaarü ngechaü̃. Rü tüxü̃ nimuxẽxẽ nhama carnérugürüxü̃.
42 Rü ngẽmaxü̃ nadaugügu i ngẽma duü̃xü̃gü i Tupanape̱xewa mexü̃ rü tá nataãxẽgü. Notürü ngẽma chixexü̃arü üruü̃gü rü tá narüngea̱xgümare.
43 Rü yíxema tümaãẽxü̃ cuáxe rü name nixĩ i nagu tarüxĩnüxü̃ i nhaa tümamaxã nüxü̃ chixuxü̃ nax ngẽmaãcü nüxü̃ tacuáxü̃ca̱x nax nhuxãcü poraãcü tüxü̃ nangechaü̃xü̃ ya tórü Cori ya Tupana.
