Salmo 108:1-13
Íchamemare nax Tupanaca̱x chawiyaexü̃
108 108:1-2 Nhu̱xma rü íchame, Pa Chorü Tupanax, rü íchame nax chorü wiyaemaxã cuxü̃ chicua̱xüüxü̃. Rü pa̱xmama tá ícharüda rü chorü paxetaruü̃gümaxã tá chapaxeta. Rü ngẽmaãcü tá nüxü̃ charümoxẽ i ngẽma ngexwaca̱xü̃ i ngunexü̃.
2 Nüü̃ nadau 108:1
3 Pa Cori Pa Tupanax, rü chorü wiyaegümaxã tá cuxü̃ chicua̱xüxü̃ nape̱xewa i guxü̃ma i nachixü̃anecüã̱x i duü̃xü̃gü.
4 Erü ngẽma curü ngechaü̃ rü dauxü̃guxü̃ i naanearü yexerawa nangu. Rü ngẽxgumarüxü̃ ta i curü aixcuma rü ya̱u̱xtüweanexü̃arü yexerawa nangu.
5 Pa Chorü Tupanax, cuma rü dauxü̃guxü̃ i naanemaxã icucua̱x rü curü üüne rü nhama i naane namaxã nanapá.
6 ¡Rü toxü̃ nangãxü̃ rü curü poramaxã toxü̃ ínanguxü̃xẽxẽ i toma nax toxü̃ cungechaü̃xü̃!
7 Rü cumax, Pa Tupanax, rü cupatawa quidexa rü nhacurügü: “Taãxẽãcüma tá pexna chanaxã i guxü̃ma i ngẽma naane i oéstewaama Chiquéü̃wa ixügüxü̃ rü nhu̱xmata léstewaama Sucóchiarü ngachítamaanexü̃wa nguxü̃.
8 Rü ngẽxgumarüxü̃ ta i Yiriáyiarü naane rü Manachéarü naane i natü i Yurdáũarü léstewaama ngẽxmagüxü̃ rü choxrü nixĩ. Rü ngẽma Efraĩ́arü naane i churaragü i poraxü̃ nawa ne ĩxü̃ rü choxrü nixĩ. Rü ngẽxgumarüxü̃ ta i ngẽma Yudáarü naane i Iraéutanüxü̃arü ãẽ̱xgacügü nawa ne ĩxü̃ rü choxrü nixĩ.
9 Rü ngẽma Moábiane rü Edóü̃ane rü chautüü̃wa nangexmagü. Rü ngẽma Firitéutanüxü̃gü rü chama rü tá nüxü̃ charüporamae”, nhanagürü ya Tupana.
10 108:10-11 Pa Tupanax, ¿rü texé tá Edóü̃anewa choxü̃ taga? ¿Rü texé tá norü ĩane ya poranegu choxü̃ taxücuxẽxẽ i nhu̱xmax nax toxü̃ cuxoxü̃ rü marü tama torü churaragüxü̃ íquixümücüxü̃?
11 Nüü̃ nadau 108:10
12 ¡Rü torü uwanugücha̱xwa toxü̃ rüngü̃xẽxẽ nax nüxü̃ tarüporamaegüxü̃ca̱x! Erü taxuwama toxü̃́ name i toxrüxü̃ i duü̃xü̃güarü ngü̃xẽẽ.
13 Notürü curü ngü̃xẽẽmaxã Pa Tupanax, rü tá nüxü̃ tarüporamae i ngẽma torü uanügü, erü cuma rü tá cuyayitanüxẽxẽ.
