Salmo 109:1-31
Tupanaarü ngü̃xẽẽca̱x ínaca
109 Pa Tupanax ¡tauxü̃́ i choxü̃́ nüxü̃ cuxoxü̃ i chorü yumüxẽ!
2 Erü duü̃xü̃gü i chixri maxẽxü̃ i dorata̱a̱xgüxü̃ rü chauchiga nidexagü. Rü wüxi i doramare nixĩ i ngẽma chauchiga i nüxü̃ yaxugüxü̃.
3 Rü chauchi naxaieãcüma nidexagü. Rü notüca̱xmamare chixexü̃ chauchiga nixugü.
4 Rü ngẽma chorü ngechaü̃ i naxca̱x ichaxãxü̃ rü chixexü̃maxã choxü̃́ nanaxütanügü. Notürü i chamax rü naxca̱x chayumüxẽama.
5 Rü ngẽma mexü̃ i naxca̱x chaxüxü̃ rü chixexü̃maxã nanatáeguxẽẽgü. Rü chama nüxü̃ changechaü̃yane rü chauchi naxaie.
6 Pa Tupanax ¡rü nhu̱xmax rü ngẽma chixexü̃ üxü̃ca̱x nüxü̃ naxuneta i wüxi i ãẽ̱xgacü i chixecüma nax ngẽma nüxna ca̱xaxü̃ca̱x i norü chixexü̃chiga! ¡Rü ngẽxgumarüxü̃ ta nüxü̃ naxuneta i wüxi i norü uaxü̃ruxü̃ i naxca̱x íca̱xaxü̃ nax napoxcuxü̃ca̱x!
7 Rü ngẽxguma ãẽ̱xgacü nüxna caxgu i norü chixexü̃chiga rü name nixĩ i noxtacüma poxcu namaxã naxueguxü̃. Rü ngẽxguma nügüca̱x ínacaxgu nax tama napoxcuxü̃ca̱x rü name nixĩ i noxtacüma yexeraãcü nanapoxcuama.
8 ¡Rü nanuxẽxẽ i norü maxü̃ rü noxtacüma nayu̱x nax ngẽmaãcü togü noxtacüma nayaxuxü̃ca̱x i norü puracü!
9 Rü ngẽmaãcü i naxacügü rü noxtacüma nataxcue rü naxma̱x rü noxtacüma yutexe tixĩ.
10 Rü ngẽmaãcü i naxacügü rü nu ne nanaxĩmare rü íxraxü̃ i diẽruca̱x nacaxü̃wa̱xegü. ¡Rü noxtacüma nawa ínawoxü̃ ya yima napatachicawa!
11 ¡Rü guxü̃ma i ngẽma norü ngẽmaxü̃gü, rü ngẽma diẽru naxü̃tawa nayaxuxü̃ noxtacüma yana! ¡Rü togümare i duü̃xü̃gü nüxü̃́ yana i ngẽma norü puracütanü!
12 Rü name nixĩ i taxúeaxü̃́ma nangechaü̃tümüxü̃ rü woo i naxacügü i taxcuexü̃.
13 ¡Rü noxtacüma guxü̃ yue i nataagü nax ngẽmaãcü yanaxoxochixü̃ca̱x i nape̱xeégagü!
14 Rü cumax, Pa Corix, ¡rü nüxna nacua̱xãchi i nanatüarü chixexü̃ rü tagutáma ínapi i ngẽma naéarü pecádu!
15 ¡Rü guxü̃guma nüxna nacua̱xãchi i ngẽma chixexü̃ i naxüxü̃! ¡Rü duü̃xü̃güãxẽwa ínapi i naéga!
16 Rü nüma i ngẽma chixexü̃ üxü̃ rü taguma nüxü̃́ tangechaü̃tümüxü̃ ya yíxema ingearü diẽruã̱xgüxe rü yíxema tama tügü icua̱xüü̃güxe rü yíxema guxchaxü̃maxã naxi̱xãchiãxẽgüxe. Rü nüma rü chixri tümamaxã inacua̱x rü ngẽmaãcü tüxü̃ nadai.
17 Rü nüma rü naxca̱x nadau nax chixexü̃ naxüxü̃. ¡Rü ngẽmaca̱x noxtacüma chixexü̃ namaxã yaxugüe i duü̃xü̃gü! Rü taguma naxca̱x nadau nax ta̱xacürü mexü̃ naxü. ¡Rü ngẽmaca̱x noxtacüma taguma texé mexü̃ nachiga ixu!
18 ¡Rü ngẽma nacüma i chixexü̃, rü noxtacüma yadü̱xã i naxü̃ne nhama wüxi i naxchirumaxã idü̱xü̱xü̃rüxü̃! ¡Rü naanügu rü naxchina̱xãgu, rü noxtacüma naxücu i ngẽma chixexü̃ i nagu naxĩnüxü̃ nhama dexá rüe̱xna chíxü̃ tagu ücuxü̃rüxü̃!
19 Rü ngẽma nacüma i chixexü̃ ¡rü noxtacüma yadü̱xã i naxü̃ne nhama wüxi i naxchiru naxü̃ne idü̱xü̱xü̃rüxü̃, rü noxtacüma nüxna yaxãũ nhama wüxi i goyexü̃rüxü̃!
20 Rü name nixĩ i Cori ya Tupana ngẽmaãcü nüxü̃́ nanaxütanü i ngẽma chamaxã rüxuanüã̱xgüxü̃ rü chixri chauchiga idexagüxü̃.
21 Notürü cumax, Pa Corix rü chanaxwa̱xe i choxü̃ curüngü̃xẽẽ rü mea choxna cudau nax ngẽmaãcü natachigaxü̃ca̱x i cuéga. ¡Rü curü mecümagagu choxü̃ ínanguxuchixẽxẽ nawa i ngẽma chixexü̃gü!
22 Chama rü poraãcüxüchi guxchaxü̃wa changexma rü chanaxi̱xãchiãxẽ rü chorü maxü̃newa rü poraãcü nangu̱x.
23 Rü ngẽma chorü guxchaxü̃gümaxã rü inixũ nax chixachigüxü̃ nhama wüxi i naxchipeta ixũxchigüxü̃rüxü̃. Rü nhu̱xmax rü marü chixaxüchi, rü ngẽmaca̱x ya yimá buanecü rü choxü̃ niga nhama wüxi i munüxü̃ yagaxü̃rüxü̃.
24 Rü ngẽma nax tama chachibüxü̃ca̱x rü chidu̱xrueã́pü̱xü rü chixachigü.
25 Rü duü̃xü̃güarü cugüruxü̃ chixĩ. Rü ngẽxguma choxü̃ nadaunügu rü nanexáerugü rü choxü̃ nacugüe.
26 109:26-27 ¡Choxü̃ rüngü̃xẽxẽ, Pa Cori Pa Chorü Tupanax! ¡Rü curü ngechaü̃gagu choxü̃ ínanguxuchixẽxẽ nawa i chorü guxchaxü̃gü nax ngẽmaãcü duü̃xü̃gü nüxü̃ cuáxü̃ca̱x nax aixcuma cuma yixĩxü̃ i choxü̃ curüngü̃xẽẽxü̃!
27 Nüü̃ nadau 109:26
28 Rü nhu̱xmax nax choxü̃ curüngü̃xẽẽxü̃ rü nüétama nixĩ ega woo chixexü̃ chamaxã yaxugüegu i ngẽma chamaxã rüxuanüã̱xgüxü̃. Rü name nixĩ nax naxãneexü̃. Notürü i chama nax curü duü̃xü̃ chixĩxü̃ rü chataãxẽ.
29 Rü ngẽma chorü uanügü rü name nixĩ nax poraãcü naxãneexü̃. ¡Rü ngẽma norü ãne rü noxtacüma yadü̱xã i naxü̃ne nhama wüxi i naxchirumaxã idü̱xü̱xü̃rüxü̃!
30 Rü nhaa chauã̱xmaxã rü guxü̃gutáma Cori ya Tupanana moxẽ chaxã. Rü muxü̃ i duü̃xü̃gütanüwa tá nüxü̃ chicua̱xüxü̃.
31 Erü nüma ya Tupana rü tümaétüwa nachogü ya yíxema ngearü ngẽmaxü̃ã̱xgüxe. Rü naxme̱xwa tüxü̃ ínapoxü̃ i ngẽma tüxü̃ íxuaxü̃güxü̃.
