Salmo 11:1-7
Cori ya Tupana rü aixcuma tórü poxü̃ruxü̃ nixĩ
11 Chama rü Cori ya Tupaname̱xẽwa chaugü changexmaxẽxẽ nax choxü̃ ínapoxü̃xü̃ca̱x nüxna i chorü uanügü. ¿Rü tü̱xcüü̃ choxü̃ nhapegürü: “¡Ma̱xpǘneanewa nanha nax ngẽ́ma werigürüxü̃ cugü quicúxü̃ca̱x!” nhaperügü choxü̃?
2 ¡Rü dücax, nangugü i ngẽma chixexü̃ ügüxü̃ i duü̃xü̃gü! Rü yima naxnegü rü pe̱xcunüne ya norü würawa nanadagü rü yacu̱xgüãcüma duü̃xü̃gü i mea maxẽxü̃guama nanamaxgü.
3 Rü ngẽxguma chi nüma ya ãẽ̱xgacü marü chixexü̃gu nanguxgu ¿rü nhuxãcü tá nügü ínapoxü̃ ya yimá mecü ya duü̃?
4 Notürü nüma ya Cori ya Tupana rü napata ya üünenewa nangexma. Rü nüma ya Cori rü dauxü̃guxü̃ i naanewa nüxü̃́ nangexma i norü tochicaxü̃, rü ngẽ́ma meama ínadawenü rü nanangugü i duü̃xü̃gü.
5 Rü nüma ya Tupana rü nanangugü i ngẽma mexü̃ ügüxü̃ rü ngẽma chixexü̃ ügüxü̃, rü naxchi naxai i ngẽma máxwa̱xegüxü̃.
6 Rü nüma ya Cori ya Tupana rü nhama pucürüxü̃ tá ngẽma chixexü̃ ügüxü̃étügu nanayixẽxẽ ya ã́xwe rü üxüema i ẽsúrfremaxã ãẽ́xü̃xü̃. Rü tá naxca̱x ínananguxẽxẽ ya wüxi ya buanecü nax yaxaexü̃ca̱x i guxü̃ma. Rü nüma ya Cori ya Tupana rü ngẽmaãcü tá nanapoxcue i ngẽma duü̃xü̃gü i chixexü̃ ügüxü̃.
7 Rü nüma ya Cori ya Tupana rü ixaixcumacü nixĩ, rü ngẽmaca̱x nüxü̃ nangechaü̃ i ngẽma we̱xguxü̃. Rü ngẽmaca̱x ya yíxema aixcuma imexe rü tá nüxü̃ tadaugüxüchi.
