Salmo 110:1-7
Nüma ya Cori rü ãẽ̱xgacüna pora naxã
110 Rü nüma ya Tupana rü chorü Corixü̃ nhanagürü: “¡Chorü tügünecüwawa rüto rü nhu̱xmatáta i ngẽma curü uanügü rü curü chicutüxü̃ chayaxĩxẽẽgü!” nhanagürü.
2 Rü nüma ya Tupana rü Yerucharéü̃wa cuxü̃ naxuneta nax ãẽ̱xgacü quixĩxü̃ca̱x rü namaxã icucuáxü̃ca̱x i ngẽma curü uanügü.
3 Rü ngẽma ngunexü̃ i curü uanügüxü̃ curüporamaegu rü curü duü̃xü̃gü rü tá cuxme̱xwa nügü nangexmagüxẽxẽ. Rü nimexchiruãcüma tá cupe̱xewa nangugü. Rü ngẽma curü pora rü guxü̃gutáma nitachigü nhama pucü ya guxü̃guma pa̱xmama rüngucürüxü̃.
4 Rü nüma ya Tupana rü cuxü̃ naxuneta nax Meuquichedéquirüxü̃ guxü̃guma chacherdóte quixĩxü̃. Rü nüma rü taxũtáma inayanaxoxẽxẽ i ngẽma nüxü̃ yaxuxü̃.
5 Rü nüma ya Tupana rü curü tügünecüwawa nangexma nax cuxü̃ ínapoxü̃xü̃ca̱x. Rü ngẽma ngunexü̃ i nagu nanuxü̃gu rü tá nanadai i muxü̃ma i ãẽ̱xgacügü.
6 Rü ngẽma nachixü̃anegüca̱x rü tá poxcu naxuegu. Rü ngẽxma tá nayue i muxũchixü̃ i duü̃xü̃gü. Rü guxü̃wama i nhama i naanewa rü muxü̃táma i ãẽ̱xgacügü tá ínawoxü̃.
7 Notürü nümatama ya Tupana rü ngẽma namacüwawa ngẽxmaxü̃ i natüxacüarü dexáwa tá naxaxe. Rü ngẽma dexá rü tá nayaporaxẽẽchigü.