Salmo 112:1-10
112 Name nixĩ i Cori ya Tupanaxü̃ ticua̱xüxü̃gü. Rü nataãxẽ ya yimá yatü ya Cori ya Tupanaxü̃ ngechaü̃cü rü norü mugügu imaxü̃cü.
2 Rü yimá yatü ya mexü̃gu rüxĩnücü rü Tupana tá nüxü̃ narüngü̃xẽẽ i ngẽma naxacügü rü tá naporae i nhama i naanewa.
3 Rü napatawa ya yimá yatü rü namuarü ngẽmaxü̃ã̱xgü. Rü guxü̃guma norü ngẽmaxü̃gümaxã to̱xguã̱xü̃ narüngü̃xẽẽ.
4 Rü yimá yatü rü nhama wüxi i omü i ẽanexü̃wa ibáxixü̃rüxü̃ nixĩ naxca̱x i ngẽma togü i duü̃xü̃gü i mexü̃. Rü nüma rü namecüma rü nangechaü̃wa̱xe rü nixaixcuma.
5 Rü yimá yatü ya mecümacü rü norü ngẽmaxü̃gümaxã togüxü̃ narüngü̃xẽẽ. Rü mea namaxã inacua̱x i guxü̃ma i ngẽma nüxü̃́ ngẽxmaxü̃.
6 Rü yimá yatü rü taxũtáma nagu nayarüchixe woo norü uanügü chixexü̃ namaxã ü̱xgux. Rü duü̃xü̃gü rü guxü̃gutáma nüxna nacua̱xãchigü naxca̱x i ngẽma mexü̃ i naxüxü̃.
7 Rü nüma rü taxuca̱xma naxca̱x naba̱i̱xãchi i ta̱xacürü chixexü̃ i ore i nachiga i nüxü̃ naxĩnüxü̃, erü nüxü̃ nacua̱x nax Tupana aixcuma nüxna dauxü̃.
8 Rü nüma ya yimá yatü rü taxuca̱xma norü uanügüxü̃ namuü̃. Rü nüxü̃ nacugüama erü Tupanagu nayaxõ.
9 Rü yíxema tüxü̃́ nataxúxe rü guxü̃guma norü ngúchaü̃maxã tüxna nanaxãmare i diẽru. Rü ngẽma nacüma i mexü̃ rü taguma nüxü̃ narüchau nax naxüãxü̃. Rü taxuca̱xma naxãne erü aixcuma nagu namaxü̃ i ngẽma nüxü̃ yaxuxü̃.
10 Rü ngẽma chixexü̃ ügüxü̃ rü nanue ega nüxü̃ nadaugügu. Rü norü numaxã nixü̃́xchapütagü. Notürü ngẽma norü ĩnü i ngẽma chixexü̃arü üruü̃gü rü tá nagu nayarüchixe.
