Salmo 115:1-18
115 Pa Cori Pa Tupanax ¡cugütama icua̱xüxü̃ rü tauxü̃́ i toxü̃ quicua̱xüüxü̃! ¡Rü cugü icua̱xüxü̃ naxca̱x i curü ngechaü̃ rü naxca̱x i ngẽma nax quixaixcumaxü̃!
2 ¿Rü tü̱xcüü̃ i ngẽma tama yaxõgüxü̃ rü ínacagü rü nhanagürügü: “¿Ngexcü nixĩ ya perü Tupana?” nhanagürügü?
3 Notürü tanangãxü̃ rü nhatagürügü: “Torü Tupana rü dauxü̃guxü̃ i naanewa nangexma. Rü nüma rü nanaxü i guxü̃ma i ta̱xacü i nüma nanaxwa̱xexü̃”, nhatagürügü.
4 Rü ngẽma norü tupanagü i ngẽma tama yaxõgüxü̃, rü nümatama i duü̃xü̃gü naxme̱xmaxã nanaxügü. Rü úirumü rü diẽrumünaxca̱x nixĩ.
5 Rü nüxü̃́ nangexma i naã̱x notürü tama nidexagü rü nixãxetü notürü tama ta̱xacüü̃ nadau.
6 Rü naxãchinü notürü tama ta̱xacüü̃ naxĩnüe. Rü naxãxmaraxü̃ notürü taxuxü̃ma nüxü̃ napa.
7 Rü nixãxme̱x notürü tama tüxü̃ ningṍgügü. Rü nixãcutü notürü tama inaxĩ. Rü bai i wüxi i naga i naã̱xgüwa íxũxũxü̃.
8 Rü ngẽma duü̃xü̃gü i nügüca̱xtama naxchicüna̱xãgü ügüxü̃ rü nüxü̃́ yaxõgüxü̃ rü naxrüü̃tama nixĩgü nax taxuwama yamexü̃.
9 Pa Iraéutanüxü̃güx ¡rü Cori ya Tupanagu peyaxõgü! Erü nüma rü tüxü̃ narüngü̃xẽẽ rü tüxna nadau.
10 Pa Chacherdótegüx ¡rü Cori ya Tupanagu peyaxõgü! Erü nüma rü tüxü̃ narüngü̃xẽẽ rü tüxna nadau.
11 Rü pemax, Pa Duü̃xü̃gü i Cori ya Tupanaxü̃ Ngechaxü̃güxex ¡rü nagu peyaxõgü! Erü nüma rü tüxü̃ narüngü̃xẽẽ rü tüxna nadau.
12 Rü nüma ya Cori ya Tupana rü tagu narüxĩnü rü tá tüxü̃ narüngü̃xẽẽ. Rü tá nüxü̃ narüngü̃xẽẽ i guxü̃ma i Iraéutanüxü̃gü rü norü chacherdótegü.
13 Rü tá mexü̃ tümamaxã naxuegu ya yíxema nüxü̃ ngechaü̃güxe woo yaxe rü buxe.
14 Rü chanaxwa̱xe, Pa Iraéutanüxü̃x, nax Cori ya Tupana pexü̃ imuxẽẽxü̃ rü yamuxẽẽãxü̃ i pexacügü.
15 Rü nüma ya Cori ya Tupana i dauxü̃guxü̃ i naane rü nhama i naanearü üruxü̃ rü aixcuma tá pexna nanaxã i norü ngü̃xẽẽ.
16 Rü Cori ya Tupanaarü nixĩ i dauxü̃guxü̃ i naane, notürü duü̃xü̃güna nanaxã i nhama i naane.
17 Rü ngẽma marü yuexü̃ i naxmaxü̃wa ngẽxmagüxü̃ rü taxucürüwama Cori ya Tupanaxü̃ nicua̱xüxü̃gü i nhama i naanewa.
18 Notürü i yixema i nhu̱xmax nax imaxẽxü̃ rü tá nüxü̃ ticua̱xüxü̃gü i nhu̱xmax rü guxü̃gutáma ¡Rü ngĩxã nüxü̃ ticua̱xüxü̃gü ya Cori ya Tupana!
