Salmo 118:1-29
118 Pa Duü̃xü̃güx, ¡rü Cori ya Tupanana moxẽ pexãgü! Erü nüma rü namecümaxü̃chi rü guxü̃guma tüxü̃ nangechaü̃.
2 Pa Iraéutanüxü̃güx, rü name nixĩ i nhapegürügü: “Cori ya Tupanaarü ngechaü̃ rü taguma inayagu̱x.”
3 Rü ngẽxgumarüxü̃ ta i pemax, Pa Chacherdótegüx, rü name nixĩ i nhapegürügü: “Cori ya Tupanaarü ngechaü̃ rü taguma inayagu̱x.”
4 Rü ngẽxgumarüxü̃ ta i pemax i tórü Cori ya Tupanaxü̃ ngechaü̃güxe, rü name nixĩ i nhapegürügü: “Cori ya Tupanaarü ngechaü̃ rü taguma inayagu̱x”, nhapegürügü.
5 Rü yexguma taxü̃ ga guxchaxü̃wa chayexmagu rü Cori ya Tupanaarü ngü̃xẽẽca̱x íchaca. Rü nüma rü choxü̃ naxĩnü rü nawa choxü̃ ínanguxuchixẽxẽ ga yema chorü guxchaxü̃gü.
6 Rü nüma ya Cori ya Tupana rü nachauxü̃tagu rü ngẽmaca̱x tama chamuü̃. ¿Rü nhu̱xmax rü texé tapora nax ta̱xacürü chixexü̃gu choxü̃ tanguxẽẽxü̃?
7 Rü nüma ya Cori ya Tupana rü nachauxü̃tagu, rü nüma nixĩ i choxü̃ nangü̃xẽẽxü̃. Rü tá nüxü̃ chadau nax nhuxãcü Tupana tá nüxü̃ rüporamaexü̃ i ngẽma chauxchi aiexü̃.
8 Rü name nixĩ nax Cori ya Tupanagu yaxõgüxü̃ rü tama i duü̃xü̃gügu.
9 Rü name nixĩ nax Cori ya Tupanagu yaxõgüxü̃ rü tama i ãẽ̱xgacügü i poraexü̃gu.
10 Rü guxü̃ma ga yema togü ga nachixü̃anecüã̱xgü rü cha̱u̱xca̱x ínayaxüãchi rü choxü̃ ínachomaeguãchi nax choxü̃ yama̱xgüxü̃ca̱x. Notürü Tupanaégagu nüxü̃ charüporamae.
11 Rü guxü̃wama choxü̃ ínachomaeguãchi, notürü Tupanaégagu nüxü̃ charüporamae.
12 Rü nhama máxegürüxü̃ choxü̃ ínachomaeguãchi ga chorü uanügü. Notürü yema nax nanuexü̃ rü nhama ta̱xacü i axü̃ rü paxama ixoxü̃rüxü̃ nixĩgü. Yerü Tupanaégagu nüxü̃ charüporamae.
13 Rü norü numaxã cha̱u̱xca̱x nibuxmü nax choxü̃ yama̱xgüxü̃ca̱x, notürü nüma ya Cori ya Tupana rü choxü̃ ínapoxü̃.
14 Rü ngẽmaca̱x chorü wiyaemaxã Cori ya Tupanaxü̃ chicua̱xüxü̃ erü nüma nixĩ i choxü̃ naporaxẽẽxü̃. Rü nüma nixĩ i choxü̃ namaxẽẽxü̃.
15 Rü ngẽma Tupanaarü duü̃xü̃gü rü napatagüwa taãxẽãcüma nawiyaegü i ngẽxguma nüxü̃ naxĩnüegu nax nhuxãcü Tupana naporamaegüxẽẽxü̃ nüxü̃ i ngẽma namaxã rüxuanüã̱xgüxü̃. Rü nhanagürügü: “Nüma ya Cori ya Tupana rü norü poramaxã tüxü̃ ínapoxü̃ nüxna i ngẽma tamaxã rüxuanüã̱xgüxü̃.
16 Erü ngẽma norü pora ya Tupana rü taxuxü̃ma i to i poramaxã nawüxigu. Rü ngẽma norü poramaxã nixĩ i nüxü̃ nayexeraxü̃ i ngẽma tamaxã rüxuanüã̱xgüxü̃”, nhanagürügü.
17 Rü nhu̱xmax rü taxũtáma paxa chayu. Rü tá chamaxü̃ nax ngẽmaãcü nüxü̃ chixuxü̃ca̱x i guxü̃ma i ta̱xacü i naxüxü̃ ya Cori ya Tupana.
18 Rü nüma ya Cori ya Tupana rü poraãcü choxü̃ naxü notürü tama choxü̃ ínata̱x nax chayuxü̃ca̱x.
19 ¡Rü peyawãxna̱x i ngẽma Tupanapataarü ĩã̱x! Rü ngẽxma chaxücuchaü̃ nax Cori ya Tupanana moxẽ chaxãxü̃ca̱x.
20 Rü ngẽma napataarü ĩã̱xwa nixĩ i yachocuxü̃ i ngẽma aixcuma norü duü̃xü̃gü ixĩgüxü̃.
21 Pa Corix, moxẽ cuxna chaxã erü choxü̃́ nüxü̃ cuxĩnü i chorü yumüxẽ rü choxü̃ cungãxü̃ga. Erü cuma rü chorü maxẽẽruxü̃ quixĩ.
22 Rü yimá nuta ya ĩpataarü üruü̃gü nüxü̃ oecü rü yimá nixĩ ya nhu̱xmax nüxíra yaxücuchigüãcü.
23 Rü Cori ya Tupana nixĩ ya ngẽmaãcü naxücü rü ngẽmaca̱x tataãxẽgü erü wüxi i mexechixü̃ nixĩ.
24 Rü nhaa nixĩ i ngẽma ngunexü̃ i nagu Tupana mexü̃ taxca̱x üxü̃. ¡Rü ngĩxã poraãcü tataãxẽgü!
25 Pa Corix ¡paxa torü uanügüme̱xẽwa toxü̃ ínanguxü̃xẽxẽ! ¡Rü toxü̃ rüngü̃xẽxẽ nax mea toxü̃ nangupetüxü̃ca̱x!
26 Rü Tupana rü namaxã nataãxẽ ya yimá naégagu núma ũcü. Rü toma rü Tupanapatawa mexü̃ pemaxã taxuegu.
27 Rü nüma ya Cori nixĩ i tórü Tupana yixĩxü̃. Rü nüma nixĩ i tüxü̃ yabáixmaxü̃xü̃. ¡Rü ngĩxã napatawa ngẽxmaxü̃ i ãmarechicagu tayanu i ngẽma naitanügü i nüxna ixãmaregüxü̃!
28 Rü cuxna moxẽ chaxã, Pa Corix, rü cuxü̃ chicua̱xüxü̃ erü cuporaxüchi rü chorü Tupana quixĩ.
29 ¡Rü nüxna moxẽ pexãgü ya Cori ya Tupana! Erü nüma rü namecümaxü̃chi rü ngẽma norü ngechaü̃ rü taguma inayagu̱x.
