Salmo 12:1-8
Yumüxẽ i nawa Tupanaarü ngü̃xẽẽca̱x íca̱xaxü̃
12 Pa Cori Pa Tupanax ¡paxa toxü̃ rüngü̃xẽxẽ! Erü marü nataxuma i ngẽma aixcuma cuxü̃́ yaxõgüxü̃. Rü marü inarüxo i ngẽma duü̃xü̃gü i aixcuma mexü̃gu rüxĩnüexü̃.
2 Rü nügütanüwa i duü̃xü̃gü rü nügü nawomüxẽẽgü. Rü mea nidexagüneta notürü tama aixcumaxü̃ nixugü.
3 Pa Tupanax ¡iyanaxoxẽxẽ i guxü̃ma i ngẽma nügü írümegünetaxü̃ rü ngẽma nügü icua̱xüü̃güxü̃!
4 ¡Rü napoxcue i ngẽma nhagüxü̃: “Toma rü mea nüxü̃ tacua̱xgü nax tidexagüxü̃ rü torü oremaxã togü ítapoxü̃. ¿Rü texé tá toxü̃ tarüngea̱xgüxẽxẽ?” nhagüxü̃!
5 Notürü nüma ya Cori ya Tupana rü pexü̃ nangãxü̃ rü nhanagürü pexü̃: “Yíxema ngearü ngẽmaxü̃ã̱xgüxe rü chixri tümamaxã ipecua̱xgüxe rü ngúxü̃ tüxü̃ pingexẽẽgü. Rü ngẽmaca̱x i nhu̱xmax i chama rü tá tümaétüwa chachogü rü tá tüxü̃ charüngü̃xẽẽ erü ngẽma nixĩ i guxü̃guma tüma tanaxwa̱xegüxü̃”, nhanagürü.
6 Rü ngẽma Cori ya Tupanaarü uneta rü aixcuma nixĩ. Rü nüma rü tama nidora ega ta̱xacüxü̃ yaxuxgux. Rü ngẽma nüxü̃ yaxuxü̃ rü aixcumama nayanguxẽxẽ. Rü ngẽma diẽrumü i 7 e̱xpü̱xcüna i guxü̃rüxü̃ nixĩ nax namexü̃ i norü uneta.
7 12:7-8 Pa Cori Pa Tupanax, rü woo guxü̃ma i duü̃xü̃gü rü namaxã nataãxẽ i ngẽma chixexü̃ i naxügüxü̃ rü woo guxü̃wama toxü̃ ínachomaeguãchi i ngẽma duü̃xü̃gü, notürü i cuma rü tá toxna cudau rü guxü̃gutáma toxü̃ ícupoxü̃ nüxna i ngẽma chixexü̃ ügüxü̃.
8 Nüü̃ nadau 12:7