Salmo 122:1-9
Yerucharéü̃xü̃ nicua̱xüxü̃
122 Rü chataãxẽ i ngẽxguma choxü̃ nangĩxãgügu nax Cori ya Tupanapatawa chamaxã naxĩxü̃.
2 Pa Ĩane ya Yerucharéü̃x, marü curü ĩã̱xarü aixepewa tangexmagü.
3 Pa Yerucharéü̃x, cuxü̃ naxügü nax cuwa nangutaque̱xegüxü̃ i Tupanaarü duü̃xü̃gü.
4 Rü cuwa nixĩ i naxĩxü̃ i guxü̃ma i Tupanaarü duü̃xü̃gü i Iraéutanüxü̃ nax Cori ya Tupanaxü̃ yacua̱xüü̃güxü̃ca̱x ngẽma nüma namaxã nüxü̃ yaxuxü̃rüxü̃.
5 Rü Yerucharéü̃wa nixĩ i nangexmaxü̃ i ngẽma tochicaxü̃gü i ãẽ̱xgacügü i guxchaxü̃arü mexẽẽruü̃gü nawa rütogüxü̃. Rü ngẽma tochicaxü̃gü rü ãẽ̱xgacü ga Dawípatawa nixĩ i nangexmagüxü̃.
6 ¡Rü guxü̃nema ya perü maxü̃nemaxã Tupanana peca nax Yerucharéü̃wa nangexmaxü̃ca̱x i taãxẽ! Rü namaxã nüxü̃ pexu ya yima ĩane rü nhaperügü: “Tanaxwa̱xe i cuwa mea namaxẽ i ngẽma cuxü̃ ngechaü̃güxü̃”, nhaperügü.
7 Pa Yerucharéü̃x, chanaxwa̱xe i cuwa nangexma i taãxẽ rü curü ãẽ̱xgacügüpatawa nax nataxuxü̃ i guxchaxü̃gü.
8 Rü nhu̱xmax rü chaueneegüca̱x rü chamücügüca̱x chanaxwa̱xe i cuwa nangexma i taãxẽ, Pa Yerucharéü̃x.
9 Rü yima tórü Cori ya Tupanapatagagu cuxca̱x chayumüxẽ nax mea cuxü̃ naxüpetüxü̃ca̱x, Pa Yerucharéü̃x.