Salmo 125:1-5
Tupana rü norü duü̃xü̃güna nadau
125 Rü yima ma̱xpǘne ya Chiã́ũ ya taxúema ixũgachixẽxẽnerüxü̃ nixĩgü i ngẽma Cori ya Tupanaaxü̃́ yaxõgüxü̃ nax taguma texé naxüchicüüxü̃ i norü ĩnü.
2 Rü yima ĩane ya Yerucharéü̃ ya ma̱xpǘnegümaxã íxümaeguãchine, rü ngẽxgumarüxü̃ ta i nüma ya Cori ya Tupana rü guxü̃gutáma norü poramaxã ínanapoxexü̃ i norü duü̃xü̃gü.
3 Rü ngẽma chixecümaxü̃ i ãẽ̱xgacü rü taxũtáma guxü̃gu duü̃xü̃gümaxã inacuáxecha nawa i nhaa naane i Tupana norü duü̃xü̃güxü̃ nagu namugüxü̃. Erü nüma ya Tupana rü tama nanaxwa̱xe nax norü duü̃xü̃gü nagu maxẽxü̃ i ngẽma nacüma i chixexü̃.
4 Pa Corix ¡nüxü̃ rüngü̃xẽxẽ i ngẽma duü̃xü̃gü i mea maxẽxü̃ rü aixcuma mexü̃gu rüxĩnüexü̃!
5 Notürü ngẽma duü̃xü̃gü i chixexü̃ i nacümagu ĩxü̃ ¡rü poxcu namaxã naxuegu! Erü ngẽmatama nixĩ i woetama naxca̱x ixĩxü̃ i ngẽma chixexü̃ ügüxü̃. ¡Rü Iraéutanüxü̃na naxã i taãxẽ!