Salmo 126:1-6
Toma nax to i nachixü̃anewa tagagüxü̃ rü tanaxwa̱xe i toxü̃ cuwoeguxẽxẽ
126 Rü yexguma Tupana Yerucharéü̃ca̱x tüxü̃ woeguxẽẽgu rü taxca̱x rü ixanegüexü̃rüü̃mare nixĩ.
2 Rü yexguma ga yixema rü tórü taãxẽmaxã tacugüe rü aita taxüe. Rü yemaca̱x ga yema tama Tupanaaxü̃́ yaxõgüxü̃ rü nhanagürügü: “Nüma ya Cori ya Tupana rü taxü̃ i mexü̃ naxca̱x naxü i ngẽma norü duü̃xü̃gü”, nhanagürügü.
3 Rü aixcuma Cori ya Tupana rü taxü̃ i mexü̃ taxca̱x naxü rü ngẽmaca̱x poraãcü tataãxẽgü.
4 Notürü, Pa Corix, nangexma i tomücügü i nhu̱xmax rü ta to i nachixü̃anegüwatama ngẽxmagüxü̃. Rü ngẽma rü ta tanaxwa̱xe nax Yerucharéü̃ca̱x cunawoeguxẽẽxü̃ nax nümagü rü ta nataãxẽgüxü̃ca̱x nhama paanexü̃ i pucümaxã taãxẽxü̃rüxü̃.
5 Rü yíxema auxãcüma toegüxe rü taãxẽãcüma tanayaxu i tümanetüarü o.
6 Rü yíxema auxãcüma yangexpü̃xü̃xe i tümaarü nanetüchire nax tayatoxü̃ca̱x rü ngẽxguma yaxo̱xgu rü tayabuxgügu i tümaarü nanetü rü wiyaeãcüma tá ítayangepü̃xü̃ i muxũchixü̃ i tümaarü nanetüarü o.
