Salmo 128:1-6
Cori ya Tupanaarü ngü̃xẽẽchiga
128 Rü cutaãxẽ i cumax erü nüxü̃ quicua̱xüxü̃ rü naga cuxĩnü ya Cori ya Tupana.
2 Rü cuma rü tá cunangõ̱x i ngẽma curü puracüwa ne ũxü̃ i cunetüarü o. Rü tá cutaãxẽ rü mexü̃ tá cuxü̃ naxüpetü.
3 Rü cupatawa i cuxicatama cuxma̱xmaxã ícungexmaxü̃wa rü tá itaãxẽ. Rü nhama wüxi i úwa i oxochixü̃rüxü̃ tá nimu i cuxacügü. Rü nhama oríwachacüxü i ngexwaca̱x rüxügüxü̃rüxü̃ tá naporae i ngẽma cuxacügü i curü mechacüwawa rütogüxü̃.
4 Rü ngẽmaãcü Tupana tá nüxü̃ narüngü̃xẽẽ ya yimá duü̃ ya Tupanaxü̃ ngechaü̃cü.
5 ¡Rü Cori ya Tupana ya Chiã́ũgu ãpatacü cuxü̃ rüngü̃xẽxẽ! ¡Rü Tupana cuxü̃ rüngü̃xẽxẽ nax guxü̃ma i curü maxü̃gu nüxü̃ cudauxü̃ nax nhuxãcü nüma ya Tupana Yerucharéü̃xü̃ nangü̃xẽẽxü̃!
6 ¡Rü Tupana cuxü̃́ nama̱xẽxẽ i curü maxü̃ nax ngẽmaãcü nüxü̃ cudauxü̃ i cutaagü! ¡Rü Tupana tüxü̃ rüngü̃xẽxẽ nax nua Iraéutanüwa nangexmaxü̃ i taãxẽ rü tórü uanügü tama tüxü̃ chixewexü̃!
