Salmo 129:1-8
Tupana rü Iraéuanexü̃ ínanguxuchixẽxẽ nüxna i norü uanügü
129 Rü nhu̱xmax i Iraéuane rü nhanagürü: “Chama rü muxü̃ma ga ngúxü̃wa chaxüpetü noxritama changextü̱xügu.
2 Rü aixcuma muxü̃ma ga ngúxü̃wa chaxüpetü noxritama changextü̱xügu, notürü taxuxü̃ma choxü̃ narüporamae i chorü uanügü.
3 Rü poraãcü choxü̃ nacua̱i̱xgü rü choxü̃ nanapi̱xẽẽgü.
4 Notürü nüma ya Cori ya aixcuma mecümacü rü choxü̃ ínanguxuchixẽxẽ naxme̱xwa i ngẽma chorü uanügü i chixexü̃gu maxẽxü̃”, nhanagürü i Iraéuane.
5 Rü ngẽma Yerucharéü̃arü uanügü rü chanaxwa̱xe nax yaxãnetanüãchixü̃ rü taxcha̱xwa yabuxmüxü̃.
6 Rü name nixĩ nax yanamaãchigüxü̃ i ngẽma norü uanügü nhama wüxi ya maxẽ ya ĩã̱xca̱xwe̱xwa üa̱xcü paxa rümaãchixẽẽcürüxü̃.
7 Rü name nixĩ i nhama trígu i taguma norü owa nguxü̃ rü taguma ibuxarü oṍxü̃rüxü̃ nixĩgü.
8 Rü ngẽxguma texé nüxü̃ da̱xgu rü taxúematáma nhatagürü nüxü̃: “¡Tupana pexü̃ rüngü̃xẽxẽ! ¡Rü Cori ya Tupanaégagu mexü̃ pexü̃ ngupetü!” nhatagürü nüxü̃.