Salmo 132:1-18
Dawímaxã inaxuneta ga Tupana
132 132:1-2 Pa Cori Pa Yacúarü Tupana ya Poraxüchicüx ¡rü nüxna nacua̱xãchi ya Dawí rü norü oégaãẽ naxca̱x ga guma cupata! ¡Rü nüxna nacua̱xãchi ga yema norü uneta ga cumaxã nüxü̃ yaxuxü̃ ga yexguma nhaxgu:
2 Nüü̃ nadau 132:1
3 132:3-5 “Chama rü taxũtáma chapatagu charüxã̱ũ̱x rü taxũtáma ichaca nax icharüngü̃xü̃ca̱x, rü taxũtáma chapexetü, rü bai i nhuxgu tá chapexü̃ nhu̱xmatáta chanaxü ya wüxi ya ĩpata naxca̱x ya Cori ya Yacúarü Tupana ya poraxüchicü nax ngẽ́ma nangexmaxü̃ca̱x i ngẽma baú i norü mugüchixü̃”, nhaxgu!
4 Nüü̃ nadau 132:3
5 Nüü̃ nadau 132:3
6 Rü noxri rü nüxü̃ taxĩnüechiga nax Efrátawa nayexmaxü̃ ga yema baú ga Tupanaarü mugüchixü̃. Rü yixcüra rü Yáaarü ĩanechipenügu nüxü̃ itayangau.
7 ¡Rü nhu̱xmax rü ngĩxã Tupanapatagu tachocu nax ngẽ́ma nape̱xewa nüxü̃ yarücua̱xüü̃güxü̃ca̱x!
8 ¡Rü inachi, Pa Cori Pa Tupanax, rü cupatagu naxücu namaxã i curü mugüchixü̃ i curü poraarü cua̱xruxü̃ ixĩxü̃ nax ngẽ́ma cupatawa cungexmaxü̃ca̱x!
9 Rü ngẽma chacherdótegü i curü puracütanüxü̃gü rü tá nicómüchiru rü ngẽma curü duü̃xü̃gü rü norü taãxẽmaxã tá aita naxüe.
10 Rü curü duü̃ ga Dawígagu ¡rü tauxü̃́ i choxü̃ cuxoxü̃ i chama i nachicüxü choxü̃ cuxunetaxü̃ nax ãẽ̱xgacü chixĩxü̃ca̱x!
11 Yerü cumax, Pa Corix, rü chaunatü ga Dawímaxã icuxuneta namaxã i wüxi i uneta i taxucürüwama cuxüchicüüxü̃.
12 Yerü nhacurügü nüxü̃: “Rü cuchicüxü tá wüxi i cunexü̃ chaxuneta nax nüxí ãẽ̱xgacü yixĩxü̃ca̱x. Rü ngẽxguma cunegü chauga naxĩnüegu rü yanguxẽẽgüãgu i ngẽma chorü mugü i namaxã nüxü̃ chixuxü̃ rü ngẽma nanegü rü tá ta nüxí guxü̃gutáma ngẽma curü tochicaxü̃wa narütogü nax Iraéuanecüã̱xarü ãẽ̱xgacügü yixĩgüxü̃ca̱x”, nhacurügü.
13 Rü nüma ga Cori rü nüxü̃ naxuneta ga yima ma̱xpǘne ga Chiã́ũ nax yimagu naxãchiü̃xü̃ca̱x.
14 Rü nüma ya Tupana rü nhanagürü: “Daa nixĩ ya yima ma̱xpǘne i chanaxwa̱xene nax guxü̃guma nawa changexmaxü̃. Rü ngẽxma tá chaxãchiü̃ erü chorü me nixĩ.
15 Rü ngẽma chorü duü̃xü̃güarü nanetügü rü tá poraãcü nüxü̃́ chayaxoxẽxẽ nax ngẽmaãcü tama nataiyaexü̃ca̱x i woo i ngẽma duü̃xü̃gü i ngearü diẽruã̱xgüxü̃.
16 Rü tá cua̱x nüxna chaxã i Iraéutanüxü̃arü chacherdótegü nax natanüxü̃étüwa nachogüexü̃ca̱x i chape̱xewa. Rü ngẽma chorü duü̃xü̃gü rü norü taãxẽmaxã tá aita naxüe.
17 Rü marü namaxã ichaxüga ga gumá ãẽ̱xgacü ga Dawí ga chama nüxü̃ chaxunetacü. Rü nataagü rü guxü̃gutáma ãẽ̱xgacügü nixĩgü nhama wüxi i omü i ngẽ́ma náiechaxü̃rüxü̃. Rü Dawítaatanüwa tá chanango̱xẽxẽ ya wüxi ya ãẽ̱xgacü ya poraxüchicü.
18 Rü norü uanügü rü poraãcü tá chanaxãneexẽxẽ. Notürü i nüma ya ãẽ̱xgacü rü tá chanataxẽxẽ rü tá nüxü̃ chicua̱xüxü̃”, nhanagürü ga Cori ya Tupana.
