Salmo 136:1-26
136 ¡Moxẽ nüxna pexãgü ya Cori ya Tupana! Erü nüma rü namecümaxü̃chi rü ngẽma norü ngechaü̃ rü taguma inayagu̱x.
2 ¡Moxẽ nüxna pexã ya yimá Tupana ya guxü̃ma i tupananetagüétüwa ngẽxmacü! Erü ngẽma norü ngechaü̃ rü taguma inayagu̱x.
3 ¡Rü moxẽ nüxna pexã ya Cori ya Tupana ya guxü̃ma i corigüarü ãẽ̱xgacü ixĩcü! Erü ngẽma norü ngechaü̃ rü taguma inayagu̱x.
4 Rü nüxicatama nixĩ i naxüãxü̃ i taxü̃ i mexü̃gü. Erü ngẽma norü ngechaü̃ rü taguma inayagu̱x.
5 Rü nüma nixĩ i norü cua̱xmaxã naxüãxü̃ i dauxü̃guxü̃ i naane. Erü ngẽma norü ngechaü̃ rü taguma inayagu̱x.
6 Rü nüma nixĩ ga dexáétüwa nango̱xẽẽãxü̃ ga waixümü. Erü ngẽma norü ngechaü̃ rü taguma inayagu̱x.
7 Rü nüma nixĩ ga naxüãxü̃ ga üa̱xcü rü tauemacü. Erü ngẽma norü ngechaü̃ rü taguma inayagu̱x.
8 Rü nüma rü nanaxü ga üa̱xcü nax ngunecü inabáxixü̃ca̱x. Erü ngẽma norü ngechaü̃ rü taguma inayagu̱x.
9 Rü nüma rü nanaxü ga tauemacü rü ẽxtagü nax chütacü inabáixgüxü̃ca̱x. Erü ngẽma norü ngechaü̃ rü taguma inayagu̱x.
10 Rü nüma nixĩ ga nadaiaxü̃ ga nüxíraxü̃güxü̃ ga nanegü ga yema Eyítuanecüã̱xgü. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
11 136:11-12 Rü nüma nixĩ ga norü poramaxã Eyítuanewa ínanguxü̃xẽẽãxü̃ ga Iraéutanüxü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
12 Nüü̃ nadau 136:11
13 Rü nüma nixĩ ga Már ga Dauchiüxü̃ ga taxregu yayauxyeü̃chixüãxü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
14 Rü nüma nixĩ ga yema már ga yayauxyeü̃chixüxü̃wa yachoü̃xẽẽãxü̃ ga yema Iraéutanüxü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
15 Rü nümatama nixĩ ga yema Már ga Dauchiüxü̃gu nanguxẽẽãxü̃ ga Eyítuanecüã̱xarü ãẽ̱xgacü ga Faraóũ namaxã ga norü churaragü. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
16 Rü nhu̱xũchi nüma nixĩ ga yema naane ga taxúema nagu ãpataü̃gu yagagüaxü̃ ga yema norü duü̃xü̃gü ga Iraéutanüxü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
17 Rü nüma nixĩ ga nadaiaxü̃ ga to ga nachixü̃anegüarü ãẽ̱xgacügü ga poraexü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
18 Rü woo nax naporaexü̃ ga yema ãẽ̱xgacügü notürü nüma ga Tupana rü nanadaiama. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
19 136:19-20 Rü yemaacü nanadai ga ãẽ̱xgacügü ga Cheṹ ga Amuréutanüxü̃güarü ãẽ̱xgacü rü Óyi ga Bacháü̃anearü ãẽ̱xgacü. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
20 Nüü̃ nadau 136:19
21 136:21-22 Rü Tupana nixĩ ga nüxü̃ yanucü ga yema ãẽ̱xgacügüarü naane nüxü̃ ga Iraéutanüxü̃. Erü ngẽma norü ngechaü̃ i Iraéutanüxü̃ca̱x rü taguma inayagu̱x.
22 Nüü̃ nadau 136:21
23 Rü nüma ya Tupana rü tüxna nacua̱xãchi ngẽxguma taxü̃ i guxchaxü̃wa ingexmagügux. Erü ngẽma norü ngechaü̃ i taxca̱x rü taguma inayagu̱x.
24 Rü nüma nixĩ i tüxü̃ ínapoxü̃xü̃ nüxna i tórü uanügü. Erü ngẽma norü ngechaü̃ i taxca̱x rü taguma inayagu̱x.
25 Rü nüma nixĩ i duü̃xü̃güxü̃ rü naexü̃güxü̃ nachibüexẽẽxü̃. Erü ngẽma norü ngechaü̃ rü taguma inayagu̱x.
26 ¡Rü moxẽ nüxna pexãgü ya yimá Tupana ya dauxü̃wa ngẽxmacü! Erü ngẽma norü ngechaü̃ rü taguma inayagu̱x.
