Salmo 138:1-8
Cori ya Tupanana moxẽ naxã ya Dawí
138 Rü guxü̃ma i chorü maxü̃maxã tá moxẽ cuxna chaxã, Pa Cori Pa Tupanax. Rü ngẽma togü i nachixü̃anegüarü ãẽ̱xgacügü i tama cuxü̃ cua̱xgüxü̃pe̱xewa tá cuxca̱x chawiyae.
2 Rü yima cupata ya üünene íngexmaxü̃guama chadawenüãcüma tá ichacaã́pü̱xü nax ngẽmaãcü moxẽ cuxna chaxãxü̃ca̱x naxca̱x i curü ngechaü̃ rü nax aixcumacü quixĩxü̃. Erü cuma rü cugüégagu icuxuneta, rü aixcuma cuyanguxẽxẽ i guxü̃ma i ngẽma nüxü̃ quixuxü̃.
3 Rü yexguma cuxna chaca̱xgux nax choxü̃ cuporaxẽẽxü̃ rü cuma rü choxü̃ cungãxü̃ga rü aixcuma choxü̃ cuporaxẽxẽ.
4 Rü guxü̃ i nachixü̃anegüarü ãẽ̱xgacügü rü tá cuxü̃ nicua̱xüxü̃gü i ngẽxguma nüxü̃ naxĩnüegu nax nhuxãcü cuyanguxẽẽxü̃ i ngẽma nüxü̃ quixuxü̃ i curü unetagü.
5 Rü nümagü rü aixcuma tá Cori ya Tupanaxü̃ nicua̱xüxü̃gü naxca̱x i ngẽma mexü̃gü i taxü̃gü i naxüxü̃. Erü nüma ya Tupana rü naporaxüchi.
6 Rü woo dauxü̃wa nax nangemaxü̃ ya Cori ya Tupana notürü ngẽ́ma nüxü̃ nadawenü i ngẽma tama nügü icua̱xüü̃xü̃. Notürü i ngẽma nügü icua̱xüü̃xü̃ rü yáxü̃gutama nüxü̃ nacua̱x i nhuxãcü nax yixĩxü̃.
7 Rü ngẽxguma ãũcümaxü̃wa changexmagu, rü cuma rü choxü̃ ícupoxü̃ nax tama choxü̃ yama̱xgüxü̃ca̱x. Rü icunawe̱x i curü pora rü choxü̃ ícunguxuchixẽxẽ naxme̱xwa i chorü uanügü i chamaxã nuexü̃.
8 Rü nüma ya Cori ya Tupana rü aixcuma tá nayanguxẽxẽ i ngẽma mexü̃ i chorü maxü̃ca̱x nagu naxĩnüxü̃. Erü cumax, Pa Corix, rü taguma inayagu̱x nax choxü̃ cungechaü̃xü̃ rü chamaxã cumecümaxü̃. ¡Rü tauxü̃́ i choxü̃ ícutáxü̃, Pa Cori Pa Tupanax! Erü cumatama nixĩ i choxü̃ cungo̱xẽẽxü̃.
