Salmo 14:1-7
Nüma ya yatü rü chixexü̃gu narüxĩnüecha
14 Rü ngẽma duü̃xü̃gü i naechitamare maxẽxü̃ rü nagu narüxĩnüe nax nataxuxü̃ ya Tupana. Rü guxü̃ma rü chixexü̃gu narüxĩnüe rü nanaxügü i ngẽma Tupanape̱xewa chixexüchixü̃. Rü bai i wüxi i mexü̃ üxü̃.
2 Rü nüma ya Cori ya Tupana rü dauxü̃guxü̃ i naanewa duü̃xü̃güxü̃ nadawenü. Rü tüxü̃ nangugü rü ngoxi tayíxema ya tümaãẽxü̃ cuáxe rü naxca̱x dauxe.
3 Notürü guxü̃ma i duü̃xü̃gü rü chixexü̃we narüxĩ rü guxü̃ma wüxigu chixexü̃gu narüxĩnüe. Rü marü tataxuma ya texé ya mexü̃ ǘxe, rü bai ya wüxíe.
4 Rü tama naãxẽxü̃ nicua̱x i ngẽma chixexü̃ ügüxü̃. Rü norü chixexü̃maxã nanagu̱xẽxẽ i chorü duü̃xü̃gü nhama poũ ingṍxü̃ rü igu̱xẽẽxü̃rüxü̃. Rü taguma Cori ya Tupanaca̱x nadaugü.
5 Notürü ngẽma chixexü̃ ügüxü̃ rü wüxi i ngunexü̃ tá muü̃maxã nidu̱xrue. Erü Tupana rü tümaxü̃tawa nangexma ya yíxema naga ĩnüxe.
6 Rü ngẽma chixexü̃ ügüxü̃ rü tüxü̃́ nüxü̃ nacugüe i tümaarü ĩnü ya yíxema mea maxẽxe, notürü nüma ya Cori ya Tupana rü tüxü̃ ínapoxü̃.
7 Chierü yimá Tupana ya ma̱xpǘne ya Chiã́ũwa ngẽxmacü nua ũxgu nax norü uanügüme̱xẽwa ínanguxü̃xẽẽãxü̃ca̱x i norü duü̃xü̃gü i Iraéuanecüã̱xgü. Rü ngẽxguma nüma ya Cori ya Tupana ínanguxü̃xẽẽgu rü guxü̃ma i Yacútaagü i Iraéutanüxü̃gü rü tá nataãxẽgü.
