Salmo 140:1-13
Dawí rü Tupanaarü ngü̃xẽẽca̱x ínaca i norü yumüxẽwa
140 140:1-2 Pa Cori Pa Tupanax ¡naxme̱xwa choxü̃ ínanguxuchixẽxẽ i ngẽma chixexü̃ ügüxü̃ i duü̃xü̃gü! ¡Rü choxü̃ ínapoxü̃ nüxna i ngẽma máxwa̱xegüxü̃ rü ngẽma chixexü̃ca̱x daugüxü̃ rü guxü̃ i oragu rü da̱i̱xca̱x daugüxü̃!
2 Nüü̃ nadau 140:1
3 Rü yimá norü conü rü nhama ãxtapearü conürüxü̃ naxãmagu. Rü ngẽma norü dexa rü ãxtapeguchatarüxü̃ nixĩ.
4 Pa Corix ¡choxna nadau naxcha̱xwa i ngẽma chixri maxẽxü̃ i duü̃xü̃gü! ¡Rü choxü̃ ínapoxü̃ nüxna i ngẽma máxwa̱xegüxü̃ rü naxca̱x daugüxü̃ nax nhuxãcü chixexü̃gu choxü̃ nanguxẽẽgüxü̃!
5 Rü ngẽma duü̃xü̃gü i nügü icua̱xüü̃güxü̃ rü chape̱xegu nanaxǘgü i wüxi i norü yaxruxü̃. Rü choxü̃ niwaiyemaxü̃gü namaxã i ngẽma norü yaxruxü̃ rü norü bocupararuxü̃.
6 Rü chama rü marü cumaxã nüxü̃ chixu rü nhachagürü cuxü̃: “Cuma nixĩ i chorü Tupana quixĩxü̃. ¡Rü nüxü̃ naxĩnü i ngẽma cuxna naxca̱x chaca̱xü̃!
7 Pa Cori Pa Tupana Pa Chorü Maxẽẽruxü̃ ya Poracüx, rü cuma nixĩ i choxü̃ ícupoxü̃xü̃ i daiwa”, nhachagürü cuxü̃.
8 140:8-9 Pa Cori Pa Tupanax ¡rü tauxü̃́ i nüxü̃́ cunatauxchaxẽẽxü̃ i ngẽma chixexü̃arü üruxü̃ nax naxüãxü̃ca̱x i noxrütama ngúchaü̃! ¡Rü nüxna nachu̱xu nax tama yanguxẽxẽãxü̃ca̱x i ngẽma norü ĩnü i chixexü̃! Rü ngẽma chorü uanügü i choxü̃ íchomaeguãchixü̃ rü inachigü nax choxü̃ yama̱xgüxü̃ca̱x. ¡Notürü naxca̱xtama natáeguxẽxẽ i ngẽma chixexü̃ i cha̱u̱xca̱x naxügüxü̃ nax nümatama nagu nayi̱xü̃ca̱x!
9 Nüü̃ nadau 140:8
10 ¡Rü naétügu nayixẽxẽ i curü poxcu nhama ã́xwe ya inaicürüxü̃! ¡Rü wüxi i ãxmaxü̃ i taguma nawa ínachoxü̃xü̃gu nawocu!
11 ¡Rü tauxü̃́ i cunamaxẽxẽechaxü̃ i nhama i naanewa i ngẽma guxchigawa̱xexü̃! ¡Rü ngẽma máxwa̱xexü̃ rü nüxna nangu i ngẽma chixexü̃ nax ngẽma yamáxü̃ca̱x!
12 Rü chama nüxü̃ chacua̱x rü nüma ya Cori ya Tupana rü mea namaxã inacua̱x i ngẽma ngearü diẽruã́xü̃. Rü tüxü̃ ínapoxü̃ ya yíxema naxi̱xãchiãxẽgüxe.
13 Rü ngẽma duü̃xü̃gü i aixcuma mexü̃ rü tá cuxü̃ nicua̱xüxü̃gü. Rü cuxü̃tawa tá nangexmagü i ngẽma cupe̱xewa ixaixcumagüxü̃.