Salmo 141:1-10
Cuxü̃icatama chadawenü, Pa Tupanax
141 Rü nhu̱xmax nax cuxna chaca̱xaxü̃, Pa Cori Pa Tupanax, ¡rü paxa choxü̃ rüngü̃xẽxẽ! ¡Rü choxü̃ naxĩnü i nhu̱xmax nax cuxna chaca̱xaxü̃!
2 Rü nhaa chorü yumüxẽ i cumaxã nüxü̃ chixuxü̃ ¡rü nayaxu nhama pumárate̱xe i yáuanecü chaxunagüchacüxüãcüma cuxca̱x chiguxü̃rüxü̃!
3 Pa Cori Pa Tupanax ¡rü choxü̃ rüngü̃xẽxẽ nax tama ore i chixexü̃xü̃ chixuxü̃ca̱x i cuchiga!
4 ¡Rü choxna nayaxu i ngẽma chixexü̃gu nax charüxĩnüxü̃! ¡Rü tauxü̃́ i choxü̃ quingexü̃ nax chixexü̃gu chixũxü̃ca̱x rü bai i natanü nax chaxãxü̃ca̱x i norü õnawa i ngẽma duü̃xü̃gü i chixexü̃ ügüxü̃!
5 Rü choxü̃́ rü wüxi i ngü̃xẽẽ nixĩ ega ngẽxguma choxü̃ nawe̱xãchixẽẽgu i wüxi i duü̃xü̃ i cupe̱xewa mexü̃. Notürü ngẽma norü ucu̱xẽ i ngẽma chixexü̃ ügüxü̃ rü tama choxü̃́ name rü taxũtáma naga chaxĩnü. Rü guxü̃gutáma chayumüxẽ nax nüxü̃ naxoexü̃ca̱x i ngẽma chixexü̃ i nagu ínamaxẽxü̃.
6 Rü ngẽma chixexü̃ ügüxü̃ i duü̃xü̃güarü ãẽ̱xgacügü rü tá nayayitanü nhama ma̱xpǘnewa nayixü̃rüxü̃. Rü ngẽxgumama tá nüxna nacua̱xãchie nax namexü̃ ga yema ore ga namaxã nüxü̃ chixuxü̃.
7 Rü yima naxchina̱xãgü i ngẽma chixexü̃ ügüxü̃ rü naxmaxü̃xü̃tagu tá nawoone nhama mairaxü̃ i aixmüanexü̃ ngẽxma woonexü̃rüxü̃.
8 Pa Cori Pa Tupanax, rü cuxü̃ nixĩ i chadawenüxü̃. Rü cuxca̱x nixĩ i chinhaxü̃ nax choxü̃ ícupoxü̃xü̃ca̱x. ¡Rü tauxü̃́ i choxna quixũgachixü̃!
9 ¡Rü choxü̃ ínapoxü̃ nawa i ngẽma yaxruxü̃ i cha̱u̱xca̱x yanuagüxü̃ i ngẽma chixexü̃arü üruü̃gü!
10 Notürü nümatátama nagu nayi i ngẽma yaxruxü̃ i cha̱u̱xca̱x yanuagüxü̃. Rü yoxni i chamax rü tá chinha.
