Salmo 143:1-12
Pa Corix, cugu nixĩ i chayaxõxü̃
143 Pa Cori Pa Tupanax ¡choxü̃́ nüxü̃ naxĩnü i chorü yumüxẽ! ¡Rü naxca̱x irüxĩnü i ngẽma cuxna naxca̱x chaca̱xü̃! ¡Rü ẽcü choxü̃ nangãxü̃! Erü cumecüma rü aixcuma cuyanguxẽxẽ i ngẽma nüxü̃ quixuxü̃.
2 ¡Rü tauxü̃́ i choxna naxca̱x cuca̱xü̃ i chorü chixexü̃gü nax poxcu chamaxã cuxueguxü̃ca̱x! Erü cupe̱xewa rü tataxuma ya texé ya tama nüxü̃ cuáxe nax chixexü̃ taxüxü̃.
3 Rü ngẽma chorü uanügü rü chawe ningẽxü̃tanü rü waixümüwa choxü̃ nipotügü. Rü ẽanexü̃gu choxü̃ napoxcu nax ngẽ́ma chamaxü̃xü̃ca̱x naxrüxü̃ ga yema nũxcüma yuexü̃.
4 Rü nhu̱xmax rü chayaxi̱xãchiãẽxü̃chi rü chauãẽwa poraãcü chamuü̃.
5 Rü nagu charüxĩnü ga yema mexü̃gü ga taxü̃ ga nũxcüma toxca̱x cuxüxü̃. Rü nüxna chacua̱xãchi nax nhuxãcü poraãcü toxü̃ curüngü̃xẽẽxü̃.
6 Rü ngẽma nax chacuxwa̱xexüchixü̃ rü cuxca̱x chaxunagüme̱xẽ nhama waixümü i paxü̃ i dexá naxwa̱xexüchixü̃rüxü̃.
7 Pa Cori Pa Tupanax ¡paxa choxü̃ nangãxü̃! Erü ngẽmatama chayu. ¡Rü tauxü̃́ i cuxoxü̃ nax choxü̃ curüngü̃xẽẽxü̃! Erü ngẽxguma tama choxü̃ curüngü̃xẽẽgu rü tá chayu naxrüxü̃ i ngẽma yuexü̃.
8 ¡Rü pa̱xmama choxü̃ nawe̱x nax nhuxãcü poraãcü choxü̃ cungechaü̃xü̃! Erü cugu nixĩ i chayaxõxü̃. ¡Rü choxü̃ nüxü̃ nacua̱xẽxẽ nax nhuxãcü cunaxwa̱xexü̃ nax cupe̱xewa chamaxü̃xü̃! Erü cumaxã nixĩ i nüxü̃ chixuxü̃ i ngẽma chorü ngúchaü̃.
9 Pa Cori Pa Tupanax ¡nüxna choxü̃ ínanguxuchixẽxẽ i ngẽma chorü uanügü! Erü cuxca̱x nixĩ i chinhaxü̃ nax cuxü̃tagu chaugü chicúxü̃ca̱x.
10 ¡Rü choxü̃ nangu̱xẽxẽ nax chanaxüxü̃ca̱x i curü ngúchaü̃! Erü cuma nixĩ i chorü Tupana quixĩxü̃. Rü chanaxwa̱xe i cuãxẽ i üünexü̃ rü mexü̃ i nacümagu choxü̃ nixũxẽxẽ.
11 Pa Corix, cuégagu cuxna chaca nax choxü̃ cumaxẽẽxü̃ca̱x. ¡Rü choxü̃ ínanguxuchixẽxẽ nawa i nhaa ngúxü̃ i chingexü̃! Erü cuma rü cumecüma.
12 Rü cuma rü cuyanguxẽxẽ i ngẽma nüxü̃ quixuxü̃. ¡Rü ngẽmaca̱x nadai i ngẽma chorü uanügü! ¡Rü ẽcü guxü̃xü̃ma nadai! Erü chama rü curü duü̃xü̃ chixĩ.