Salmo 144:1-15
Ãẽ̱xgacü ga Dawí rü Tupanana moxẽ naxã
144 Namexechi ya Cori ya Tupana ya chorü poxü̃ruxü̃. Rü nüma nixĩ i choxü̃ nangu̱xẽẽxü̃ rü choxü̃ nüxü̃ nacua̱xẽẽxü̃ nax nhuxãcü tá daiwa chaxũxü̃.
2 Rü nüma nixĩ i aixcuma chamücü yixĩxü̃ rü chorü poxü̃ruxü̃ yixĩxü̃. Rü naxca̱x nixĩ i chinhaxü̃ nax ngẽxma chicúxü̃ca̱x. Rü nüma nixĩ i chorü nguxuchixẽẽruxü̃ rü chorü tüpe̱xeruxü̃. Rü namaxã nixĩ i chaugü chatüpe̱xexü̃. Rü nüma nixĩ i cha̱xme̱xwa nangexmagüxẽẽãxü̃ i ĩanegü.
3 Pa Cori Pa Tupanax ¿ta̱xacüwa cuxü̃́ name ya yimá duü̃ rü ngẽmaca̱x nagu curüxĩnüxü̃? ¿Rü curü ta̱xacü nixĩ ya yimá duü̃ rü ngẽmaca̱x poraãcü nüxü̃ cungechaü̃xü̃?
4 Rü yimá duü̃ rü wüxi i ngü̃ãcüürüxü̃ nixĩ i norü maxü̃. Rü ngẽma norü maxü̃ rü nhama wüxi i ga̱u̱xchipeta̱xü̃ üpetüxü̃rüü̃mare nixĩ.
5 Pa Corix ¡yawãxna i dauxü̃guxü̃ i naane rü nhama i naanegu írüxĩ! ¡Rü nüxü̃ ingṍgü ya ma̱xpǘnegü nax yanaigüxü̃ca̱x rü yacaixquegüxü̃ca̱x!
6 ¡Rü inacuxgü ya cuxnegü ya ãẽmacügü ixĩgüne nax ngẽmacha̱xwa yabuxmüxü̃ca̱x i curü uanügü!
7 144:7-8 ¡Rü ẽcü cha̱u̱xca̱x rüxue i dauxü̃guxü̃ i naanewa nax nawa choxü̃ ícuyaxuchixü̃ca̱x i nhaa taxü̃ i guxchaxü̃ i nawa changexmaxü̃! ¡Rü choxü̃ napu naxme̱xwa i nhaa chorü uanügü i dorata̱a̱xgüxü̃ i norü doramaxã choxü̃ íxuaxü̃güxü̃!
8 Nüü̃ nadau 144:7
9 Pa Corix, ngexwaca̱xü̃xü̃ i wiyaegu tá cuxca̱x chawiyae chorü paxetaruü̃maxã. Rü ngẽmaãcü chorü wiyaemaxã tá cuxü̃ chicua̱xüxü̃.
10 144:10-11 Rü cuma nixĩ i nachixü̃anegüarü ãẽ̱xgacügüxü̃ curüngü̃xẽẽxü̃ nax norü uanügüxü̃ naporamaegüxü̃ca̱x. Rü cuma nixĩ ga curü duü̃ ga Dawíxü̃ ícunguxuchixẽẽxü̃ naxme̱xwa ga norü uanügü. ¡Rü nhu̱xmax rü choxü̃ ínapoxü̃ nax tama norü taramaxã choxü̃ yama̱xgüxü̃ca̱x i chorü uanügü! ¡Rü choxü̃ napu naxme̱xwa i nhaa chorü uanügü i dorata̱a̱xgüxü̃ i norü doramaxã choxü̃ íxuaxü̃güxü̃!
11 Nüü̃ nadau 144:10
12 Rü ngẽxguma Tupanaga ixĩnüegu rü aixcuma tataãxẽgü. Rü tanegü rü mea nayae nhama nanetügü i bacaxü̃rüxü̃. Rü taxacügü rü iyamexechi nhama Tupanapataarü caxtagürüxü̃.
13 Rü tórü trígupataü̃gü rü nixããcu namaxã i naguxü̃raxü̃xü̃ i nabü. Rü tórü carnérugü rü poraãcü nimu i tórü nachitaxü̃wa.
14 Rü tórü wocagü nixãxacügü rü mea nabue i naxacügü. Rü tórü ĩanemaxü̃güwa rü taxúema ãũcümaxü̃gagu aita taxü.
15 Rü ngẽma duü̃xü̃gü i guxü̃ma i nhaa mexü̃ nüxü̃́ ngẽxmagüxü̃ rü aixcuma nataãxẽgü. Rü ngẽmatama taãxẽ nüxü̃́ nangexma i ngẽma duü̃xü̃gü i Tupana namaxã icuáxü̃.
