Salmo 145:1-21
Rü name nixĩ nax guxü̃ i duü̃xü̃gü rü Cori ya Tupanaxü̃ yacua̱xüü̃güxü̃
145 Rü chama rü tá cuxü̃ chixuchiga nax nhuxãcü nüxü̃ cucua̱xüchixü̃, Pa Tupana Pa Chorü Ãẽ̱xgacüx. Rü guxü̃gutáma cuxü̃ chicua̱xüxü̃.
2 Rü wüxichigü i ngunexü̃gu rü mexü̃ i cuchigaxü̃ tá chixu rü guxü̃gutáma cuxü̃ chicua̱xüxü̃.
3 Rü nüma ya Cori ya Tupana rü nüxü̃ nacua̱xüchi rü ngẽmaca̱x name nax nüxü̃ icua̱xüü̃güxü̃. Rü ngẽma tórü cua̱x rü tama nawa nangu nax nüxü̃ icuáxü̃ca̱x i nhuxãcü nüxü̃ nacua̱xüchixü̃ i nümax.
4 Rü papágü rü naxacügüwa tá nanangu̱xẽẽgü nax cuxü̃ yacua̱xüü̃güxü̃ naxca̱x i ngẽma cuxüxü̃. Rü tá nüxü̃ nixugügü i ngẽma mexü̃gü i curü poramaxã cuxüxü̃.
5 Rü chama rü tá nüxü̃ chixu nax nhuxãcü torü ãẽ̱xgacü ya üünecü nax quixĩxü̃ i cumax. Rü tá nüxü̃ chixu i ngẽma mexü̃gü i toxca̱x cuxüxü̃.
6 Rü duü̃xü̃gü rü nachiga tá nidexagü i ngẽma ãũcümaxü̃ i curü poramaxã cuxüxü̃. Rü chama rü tá cuxü̃ chixuchiga nax nhuxãcü guxü̃étüwa cungexmaxü̃.
7 Rü duü̃xü̃gü rü tá cuxü̃ nixuchiga nax nhuxãcü cumecümaxü̃chixü̃. Rü tagaãcü tá nüxü̃ nixugügü nax cuma rü ãẽ̱xgacü i aixcuma mea guxãmaxã icuácü quixĩxü̃.
8 Rü nüma ya Cori ya Tupana rü namecüma rü nüxü̃́ tangechaü̃tümüxü̃ rü yaxna tamaxã naxĩnü rü tüxü̃ nangechaü̃.
9 Rü nüma ya Cori ya Tupana rü guxãmaama namecüma rü ngẽma naxüxü̃wa inanawe̱x nax nhuxãcü poraãcü tüxü̃ nangechaü̃xü̃.
10 Rü guxü̃ma i ngẽma cuxüxü̃ rü tá cuxü̃ nicua̱xüxü̃gü, Pa Cori Pa Tupanax. Rü ngẽma curü duü̃xü̃gü rü tá cuxü̃ nicua̱xüxü̃gü.
11 Rü tá nüxü̃ nixugügü nax cuma rü aixcuma ãẽ̱xgacü ya üünecü quixĩxü̃ rü nhuxãcü namexechixü̃ i ngẽma curü puracü i curü poramaxã cuxüxü̃.
12 Rü ngẽmaãcü tá duü̃xü̃gü nüxü̃ nacua̱x nax nhuxãcü cuporaxüchixü̃ rü nhuxãcü ãẽ̱xgacü ya üünecü quixĩxü̃.
13 Rü cuma rü guxü̃guma ãẽ̱xgacü quixĩ rü guxü̃gutáma namaxã icucua̱x i guxü̃ma.
14 Rü nüma ya Cori ya Tupana rü tüxü̃ ínarüdagüxẽxẽ ya guxãma ya yíxema iyayitanüxe. Rü tüxü̃ naporaexẽxẽ ya guxãma ya yíxema turaexe.
15 Rü guxü̃ma i ngẽma cuxüxü̃ rü cuxü̃ narüdaunü nax cuma cunachibüexẽẽxü̃ca̱x i ngẽxguma nataiyaegu.
16 Rü cuma rü cuyaxüwemügü rü curü ngúchaü̃maxã mea cunataãxẽxẽxẽ i guxü̃ma i ngẽma maxẽxü̃.
17 Rü nüma ya Cori rü guxü̃ma i ngẽma nagu naxĩnüxü̃wa rü aixcuma nawe̱xgu. Rü guxü̃ma i ngẽma naxüxü̃wa rü namecüma.
18 Rü nüma ya Cori ya Tupana rü tüxna nangaicama ya yíxema aixcuma naga taxĩnüeãcüma norü ngü̃xẽẽca̱x ícagüxe.
19 Rü yíxema nüxü̃ ngechaü̃güxe, rü tüxna nanaxã i ngẽma naxca̱x ítacaxü̃. Rü ngẽxguma norü ngü̃xẽẽca̱x nüxna tacagüegu, rü nüma rü tüxü̃ naxĩnü rü tümaarü guxchaxü̃wa tüxü̃ ínanguxü̃xẽxẽ.
20 Rü nüma ya Cori ya Tupana rü tüxü̃ ínapoxü̃ ya yíxema nüxü̃ ngechaü̃güxe, notürü nanadai i ngẽma duü̃xü̃gü i tama naga ĩnüechaü̃xü̃.
21 Rü Cori ya Tupanaxü̃ chicua̱xüxü̃. Rü name nixĩ i guxü̃ma i duü̃xü̃gü nüxü̃ nicua̱xüxü̃gü ya yimá Üünecü i nhu̱xmax rü guxü̃gutáma.
