Salmo 146:1-10
146 Name nixĩ i nüxü̃ ticua̱xüxü̃gü ya Cori ya Tupana. Rü chama rü guxü̃ma i chorü maxü̃maxã tá Cori ya Tupanaxü̃ chicua̱xüxü̃.
2 Rü nhu̱xmax nax chamaxü̃xü̃ rü Cori ya Tupanaxü̃ tá chicua̱xüxü̃. Rü nhama rü ta chamaxü̃ rü naxca̱x tá chawiyae ya yimá chorü Tupana.
3 ¡Rü tauxü̃́ i nagu cuyaxõxü̃ i yatügü i nügü nüxü̃ cua̱xẽẽxü̃! Erü nümagü rü duü̃xü̃gümare nixĩgü rü tama maxü̃ tüxna naxã.
4 Rü ngẽxguma nayuegu rü wenaxarü waixümüxü̃ nixĩgü. Rü ngẽma ngunexü̃gutama inayarüxo i guxü̃ma i ta̱xacü i nagu naxĩnüexü̃.
5 Rü tataãxẽ ya yíxema Yacúarü Tupanaxü̃tawa nayaxúxe i tümaarü ngü̃xẽẽ rü nagu yaxṍxe ya Cori ya Tupana.
6 Rü nüma nixĩ i naxüãxü̃ i dauxü̃guxü̃ i naane rü nhama i naane, rü ngẽma már, rü guxü̃ma i ta̱xacü i nawa ingexmachigüxü̃. Rü nüma rü guxü̃guma nayanguxẽxẽ i ngẽma nüxü̃ yaxuxü̃.
7 Rü nüma rü tümaétüwa nachogü ya yíxema togü chixri tümamaxã icuáxe. Rü yíxema taiyagu ímaxẽxe rü tüxü̃ nachibüexẽxẽ. Rü yíxema poxcupataü̃wa ngẽxmagüxe rü tüxü̃ ínanguxü̃xẽxẽ.
8 Rü yíxema ingexetüxe rü tüxü̃ nidauuchigüxẽxẽ. Rü yíxema ya iyayitanüxe rü tüxü̃ ínarüdagüxẽxẽ. Rü nüma ya Cori rü nüxü̃ nangechaü̃ i ngẽma duü̃xü̃gü i mexü̃ ügüxü̃.
9 Rü nüma ya Cori ya Tupana rü nüxna nadau i ngẽma duü̃xü̃gü i tama Iraéutanüxü̃ ixĩgüxü̃ i to i nachixü̃anewa ne ĩxü̃. Rü ngẽxgumarüxü̃ ta tüxü̃ narüngü̃xẽẽ ya taxcutagü rü yutegüxe. Notürü ngẽma duü̃xü̃gü i chixexü̃ ügüxü̃arü ĩnü rü nagu nayanachixexẽxẽ.
10 Pa Yerucharéü̃x, rü nüma ya Cori ya Tupana rü guxü̃gutáma ãẽ̱xgacü nixĩ. Rü yimá curü Tupana rü gucü ya taunecügu rü tá pemaxã inacua̱x. ¡Rü ngĩxã nüxü̃ ticua̱xüxü̃gü ya Cori ya Tupana!
