Salmo 147:1-20
147 ¡Rü ngĩxã nüxü̃ ticua̱xüxü̃gü ya Cori ya Tupana! Rü name nixĩ i naxca̱x tawiyaegü. Erü wüxi i taãxẽ nixĩ nax nüxü̃ icua̱xüü̃güxü̃.
2 Rü nüma ya Cori ya Tupana rü wena ínanadaxẽxẽ ya Yerucharéü̃ rü nananutaque̱xe i ngẽma Iraéutanüxü̃gü i to i nachixü̃anegügu woonexü̃.
3 Rü nüma rü tüxü̃ nataãxẽxẽxẽ ya yíxema poraãcü ngechaü̃ ingegüxe rü tüxü̃́ nananaxẽxẽ ya yíxema ngúxü̃ ingegüxe.
4 Rü nüma rü nüxü̃ nacua̱x nax nhuxre yixĩxü̃ ya ẽxtagü rü wüxichigü rü naégamaxã nüxna naca.
5 Rü nüma ya tórü Tupana rü ãẽ̱xgacü ya guxü̃étüwa ücü nixĩ rü naporaxüchi. Rü norü cua̱x rü taguma inayagu̱x.
6 Rü nüma rü nüxü̃ narüngü̃xẽẽ i ngẽma duü̃xü̃gü i tama nügü icua̱xüü̃güxü̃ notürü nanaxãneexẽxẽ i ngẽma chixexü̃ ügüxü̃.
7 ¡Rü árpamaxã naxca̱x pewiyaegü rü moxẽ nüxna pexãgü ya tórü Tupana!
8 Rü nüma rü caixanexü̃maxã nanatüxchipeta i nhaa naane. Rü nanamexẽxẽ ya pucü nax nhaa naanexü̃ yawaixẽẽxü̃ca̱x, rü ma̱xpǘnegüwa nanaxügüxẽxẽ ya maxẽ.
9 Rü nüma rü nanachibüexẽxẽ i naexü̃gü. Rü ngẽxgumarüxü̃ ta nanachibüexẽxẽ i ngẽma weri i cúrwuxacügü i ngẽxguma naxauxegu.
10 Rü tama ngẽma cowaruarü poramaxã nataãxẽ ya Tupana rü bai i yatügüarü poragu narüxĩnü.
11 Notürü ngẽma aixcuma namaxã nataãxẽxü̃ nixĩ nax nüxü̃ ticua̱xüü̃güxü̃ ya yíxema nagu yaxõgüxe i norü ngechaü̃.
12 Pa Yerucharéü̃cüã̱xgüx ¡rü Cori ya Tupanaxü̃ pecua̱xüxü̃gü! Rü Pa Chiã́ũx ¡rü curü Tupanaxü̃ icua̱xüxü̃!
13 Erü nüma rü nanataixẽxẽ i perü ĩanearü ĩã̱x naxcha̱xwa i perü uanügü. Rü mea nüxna nadau i pexacügü i perü ĩanewa.
14 Rü nüma nixĩ i pexü̃ nangüxmüexẽẽxü̃ i pechixü̃anewa rü muxũchixü̃ i trígumaxã pexü̃ nataãxẽxẽẽgü.
15 Rü nüma rü nhama i naanewa nanamu i norü ore. Rü ngẽma norü ore rü paxama guxü̃ma i nhaa naanewa nangu.
16 Rü nüma rü nanango̱xẽxẽ i cherena i gáuxü̃ i pamüemaxü̃ i nhama carnéruta̱xarüxü̃ cómüxü̃. Rü ngẽma gáuxü̃ i ãte̱xexü̃maxã nanagüane.
17 Rü nüma rü nanayixẽxẽ i gáuxü̃ i ãpü̱xüxü̃. Rü ngẽma gáuanexü̃ i núma namuxü̃maxã rü ngẽma dexá rü ínitai.
18 Notürü yixcüama ínananguxẽxẽ ya buanecü ya naicü. Rü yimá buanecü rü inanadexẽxẽ i ngẽma gáuxü̃. Rü ngẽxguma i ngẽma dexá rü iniya̱x.
19 Rü nüma nixĩ ga Iraéutanüxü̃xü̃ nüxü̃ nacua̱xẽẽxü̃ ga norü ore rü norü mugü.
20 Notürü yema togütücumü ga duü̃xü̃gü rü taguma nüxü̃ nacua̱xgü ga yema norü ore rü norü mugü. ¡Rü ngĩxã nüxü̃ ticua̱xüxü̃gü ya Cori ya Tupana!
