Salmo 15:1-5
Tupana nanaxwa̱xe nax mexü̃ naxüxü̃ ya yatü
15 Pa Corix ¿texé tá tixĩ ya yíxema cupata ya üünenewa ngẽxmaxe? ¿Rü texé tá tixĩ ya yima curü ma̱xpǘne ya üünenegu ãchiü̃xe?
2 Rü yíxema ngearü chixexü̃ã́xe, rü mexü̃ üxe, rü ixaixcumaxe,
3 rü yíxema tama texéchiga chixri idexáxe, rü yíxema taxuxü̃ma i chixexü̃ tümamücümaxã üxe, rü yíxema taxuxü̃ma i chixexü̃ üxe namaxã i ngẽma tümaarü ngaicamagu pexü̃,
4 rü yíxema naxchi aixe i pecádugü rü tama nanaãxẽraxü̃xe i ngẽma duü̃xü̃gü i chixexü̃ ügüxü̃, rü yíxema nüxü̃ ngechaü̃güxe i ngẽma duü̃xü̃gü i Tupanaxü̃ ngechaü̃güxü̃, rü yíxema naxüamáxe i ngẽma nagu taxunetaxü̃ woo tama mea tüxü̃́ ínanguxuchigu,
5 rü yíxema tümaarü diẽru ngĩxü̃ ixãxe ngearü üétüãcüma, rü yíxema diẽruxü̃ oxe ega texé naxütanüchaü̃gu nax napoxcuxü̃ca̱x i ngẽma taxuxü̃ma i chixexü̃ üxü̃. Rü yíxema ngẽmaãcü maxü̃́xẽ rü tagutáma ta̱xacürü chixexü̃gu tüxü̃ nanguxẽxẽ.
