Salmo 150:1-6
150 ¡Cori ya Tupanaxü̃ pecua̱xüxü̃gü! ¡Rü napatawa rü nüxü̃ pecua̱xüxü̃gü! ¡Rü pema i dauxü̃guxü̃ i naanewa ngẽxmagüxe i nüma ínangexmaxü̃wa rü nüxü̃ pecua̱xüxü̃gü!
2 ¡Rü nüxü̃ pecua̱xüxü̃gü naxca̱x i ngẽma mexü̃ i norü poramaxã naxüxü̃! ¡Rü nüxü̃ pecua̱xüxü̃gü erü guxü̃guma nangexmaecha rü nataxuma i norü ügü rü norü gu̱x!
3 ¡Rü cornétamaxã rü árpamaxã rü árpaxacümaxã nüxü̃ pecua̱xüxü̃gü!
4 ¡Rü pãdérugümaxã ípexĩãchitanüãcüma nüxü̃ pecua̱xüxü̃gü! ¡Rü wowerugümaxã rü paxetaruü̃gü i ãtü̱xüxü̃maxã nüxü̃ pecua̱xüxü̃gü!
5 ¡Rü paxetaruü̃gü i ãtachinüxü̃ rü itagaxü̃maxã nüxü̃ pecua̱xüxü̃gü! ¡Rü paxetaruü̃gü i ãtachinüxü̃ rü ígaxü̃maxã nüxü̃ pecua̱xüxü̃gü!
6 ¡Rü guxü̃ma i ngẽma ingü̃ãtanücüüxü̃ rü Cori ya Tupanaxü̃ yacua̱xüxü̃gü! ¡Rü ngĩxã Cori ya Tupanaxü̃ ticua̱xüxü̃gü!