Salmo 16:1-11
Ngẽma mexü̃ i Tupana tüxna ãxü̃ rü nataxuma i to i ngẽmaarü yexeraxü̃
16 ¡Choxna nadau, Pa Tupanax! Erü cuma nixĩ i choxü̃ ícupoxü̃xü̃.
2 Chama rü marü cumaxã nüxü̃ chixu rü nhachagürü: “Cuma nixĩ i chorü Cori quixĩxü̃, rü nataxuma i to i cuxrüxü̃ aixcuma choxü̃ rüngü̃xẽẽxü̃”, nhacharügü.
3 Rü ngẽma duü̃xü̃gü i namaxã taãxẽgüxü̃ i norü tupananetachicüna̱xãgü rü nhanagürügü: “Torü tupanagü rü naporae”, nhanagürügü.
4 Rü ngẽmaca̱x nayamuxẽẽtanü i ngẽma naxchicüna̱xãgü rü nüxü̃ nicua̱xüxü̃gü guxü̃ma i norü taãxẽmaxã. Notürü i chama rü tagutáma ichaxã nawa i ngẽma nacüma i norü tupananetagüca̱x nagü nawa inabaxẽẽgüxü̃ rü bai i chauã̱xmaxã nüxü̃ chixu i ngẽma tupananetagüéga.
5 Rü cumax, Pa Corix, nixĩ i chamaxã icucuáxü̃. Rü cuma nixĩ i choxna cunaxãxü̃ i guxü̃ma i mexü̃gü. Rü cuxme̱xwa nangexma i chorü maxü̃.
6 Rü yexguma icuyanuxgu ga yema naane nüxü̃ ga Iraéutanüxü̃gü, rü yema choxna cuxãxü̃ nixĩ ga yema rümemaexü̃. Rü namexechi i ngẽma naane i choxna cuxãxü̃.
7 Rü nüxü̃ chicua̱xüxü̃ ya Cori ya Tupana erü nüma rü chamaxã inacua̱x. Rü chütacü rü nüma rü chauãxẽwa choxü̃ naxucu̱xẽ.
8 Rü guxü̃guma nagu charüxĩnüecha ya Cori. Rü nüma nax chauxü̃tawa nangexmaxü̃ rü taxuxü̃táma i ta̱xacürü chixexü̃gu choxü̃ nanguxẽxẽ.
9 Rü ngẽmaca̱x i nhu̱xmax rü guxü̃guma chataãxẽ rü taxuca̱xtáma ta̱xacüca̱x chaxoégaãxẽ.
10 Erü cuma rü taxũtáma tauquewa choxü̃ cuta̱x. Rü taxũtáma wüxi i ãxmaxü̃gu nüxü̃ curüngüma ya yima aixcuma cumücü ixĩcü.
11 Rü cuma rü tá choxü̃ cunawe̱x i ngẽma nama i maxü̃wa nadaxü̃. Rü cuxü̃tawa nangexma i taxüchixü̃ i taãxẽ, rü ngẽma taãxẽ rü taguma inayagu̱x.
