Salmo 17:1-15
Duü̃xü̃ i mea maxü̃xü̃arü yumüxẽ
17 Pa Corix ¡choxü̃́ nüxü̃ naxĩnü i chorü yumüxẽ, rü choxna naxã i ngẽma ngü̃xẽẽ i cuxna naxca̱x chaca̱xü̃! Erü cupe̱xewa rü taxuxü̃ma i chixexü̃ chaxü rü tama wüxi i dorata̱xáxü̃ chixĩ.
2 Rü cuma rü guxü̃guma quixaixcuma, rü ngẽmaca̱x guxü̃ i duü̃xü̃güpe̱xewa nango̱x nax taxuxü̃ma i chixexü̃ chaxüxü̃.
3 Rü cuma rü marü nüxü̃ cucua̱x i ngẽma chauãẽwa nagu charüxĩnüxü̃, rü chütacü rü choxna cudau. Rü choxü̃ cuxü rü taxuxü̃ma i chixexü̃ chawa icuyangau. Rü ngẽmawa nüxü̃ cucua̱x nax aixcumaxü̃ chixuxü̃.
4 Rü mea nagu chamaxü̃ i ngẽma curü mugü rü tama nüxü̃ chayadauxü̃ i ngẽma duü̃xü̃gü i máetagüxü̃ rü chixexü̃ ügüxü̃.
5 Rü aixcumama mea nagu chixũ i ngẽma cucüma rü taguma ichayange̱x.
6 Pa Tupanax, cumaxã nixĩ i chidexaxü̃ erü nüxü̃ chacua̱x rü cuma rü choxü̃́ nüxü̃ cuxĩnü i chorü yumüxẽ ega cumaxã chidexa̱xgux. ¡Rü choxna naxã i nhaa cuxna naxca̱x chaca̱xü̃!
7 Rü chanaxwa̱xe i choxü̃ cunawe̱x nax aixcuma choxü̃ cungechaü̃xü̃. Erü cuma rü tüxü̃ curüngü̃xẽẽ ya yíxema cuxü̃tawa tümaarü ngü̃xẽẽca̱x ícagüxe naxcha̱xwa i tümaarü uanügü.
8 ¡Rü choxna nadau nhama cugüpü̱xüxetüna cudauxü̃rüxü̃! ¡Rü cugüpe̱xátütüü̃wa choxü̃ nangexmaxẽxẽ!
9 Rü ngẽma chorü uanügü rü choxü̃ ínachomaeguãchi, rü ngẽma chixexü̃ i duü̃xü̃gü rü cha̱u̱xca̱x ínayaxüãchi.
10 Rü nügü yacua̱xüü̃güãcüma nidexagü, rü tama ngechaü̃xü̃ nacua̱xgü.
11 Rü choxü̃ nangugügü nax ngextá chaxũxü̃ nax choxü̃ yanguxẽẽgüxü̃ca̱x.
12 Rü nümagü rü nhama aigürüxü̃ nixĩgü nax choxü̃ iyacu̱xeü̃güxü̃ nax choxü̃ yama̱xgüxü̃ca̱x.
13 Pa Corix ¡ẽcü chauétüwa nayuxu rü nadai i ngẽma chorü uanügü! ¡Rü curü taramaxã yabuxmüxẽxẽ rü choxü̃ ínapoxü̃ nüxna i ngẽma duü̃xü̃gü i chixexü̃!
14 Pa Corix ¡curü poramaxã choxü̃ ínanguxuchixẽxẽ naxme̱xwa i ngẽma duü̃xü̃gü i chixexü̃ ügüxü̃! ¡Rü ínawoxü̃ nawa i nhama i naane i nawa nügü yacua̱xüü̃güxü̃ namaxã i norü ngẽmaxü̃gü! Rü taxuwama choxü̃́ name ega woo nümagü rü namuarü ngẽmaxü̃ã̱xgügu rü naxacügü rü meama nachibüegu rü nataagüca̱x rü muxü̃ i norü ngẽmaxü̃gü nüxü̃́ íyaxüxgu.
15 Notürü i chamax rü ngẽma namaxã chataãxẽxü̃ nixĩ nax cuxü̃xü̃chi tá chadauxü̃ rü cuxü̃tawaxüchi tá changexmaxü̃ i ngẽxguma tá yuwa ícharüdaxgux.
