Salmo 19:1-14
Ngẽma naxüxü̃wa nango̱x i Tupanaarü üüne
19 Rü ngẽma dauxü̃wa nüxü̃ idauxü̃ nanango̱xẽxẽ i Tupanaarü üüne rü norü pora. Rü guxü̃ma i ngẽma dauxü̃wa ngẽxmaxü̃ tüxü̃ nüxü̃ nacua̱xẽxẽ nax nhuxãcü namexechixü̃ i ngẽma nüma naxüxü̃.
2 Rü wüxichigü i ngunexü̃ rü wüxichigü i chütaxü̃ rü taxca̱x nanango̱xẽxẽ nax nhuxãcü namexechixü̃ ya Tupana.
3 Rü woo taxuxü̃ma i dexagüxü̃ taxĩnü rü taxuxü̃ i naga taxmachĩxẽwa nanaxu,
4 notürü ngẽma Tupanaarü üünechiga rü guxü̃ i naanewa nangu nhu̱xmata naane íyacuáxü̃wa rü nhu̱xmata üa̱xcü íngexmaxü̃wa.
5 Rü nüma ya üa̱xcü rü taãxẽãcü inarügo nax ngẽma namaxü̃gu yaxũxü̃ nhama wüxi i duü̃xü̃ inhaãchichaü̃xü̃rüxü̃ rü nhama wüxi i yatü i ngexwaca̱x ngĩwa íxũxũxü̃rüxü̃.
6 Rü nüma ya üa̱xcü rü wüxi i nhama i naanecüwawa ne naxũ rü norü tocüwawa narüxücu, rü taxucürüwa texé norü naiẽmaxü̃cha̱xwa tinha.
7 Rü Cori ya Tupanaarü ore rü aixcuma name erü nanaxüchicüxü i tacüma rü ngexwaca̱xü̃xü̃ i maxü̃ tüxna naxã. Rü Cori ya Tupanaarü mugü rü aixcumaxü̃ nixu rü cua̱xwa nanangu̱xẽxẽ ya yimá yatü ya ímemarecü nax nayauxãxü̃ i ucu̱xẽgü.
8 Rü Cori ya Tupanaarü ucu̱xẽgü rü aixcuma mea iniwe̱x rü ngẽmaca̱x taãxẽ tüxna naxã. Rü Cori ya Tupanaarü mu rü taxuwama nachixe rü ngẽmaca̱x taãxẽxü̃ tüxü̃ nacua̱xẽxẽ.
9 Rü Tupanaarü ore rü taxuwama nachixe rü tagutáma nagu̱x. Rü norü mugü rü aixcuma name rü mexü̃wa tüxü̃ nagagü.
10 Rü ngẽma mugü rü mexechixü̃ i úiruarü yexera nixĩ. Rü berure ya naxchiãü̃wa yaxunearü yexera tüxü̃́ name.
11 Rü choxü̃ ínapoxü̃ naxü̃pa nax chixexü̃gu changuxü̃ rü mexü̃ i namawa choxü̃ naga i ngẽxguma naga chaxĩnügu.
12 ¿Rü texé ya nüxü̃ cuáxe i tümaarü chixexü̃ tümawatama ngẽxmaxü̃? Pa Cori Pa Tupanax ¡choxü̃́ nüxü̃ irüngüma i ngẽma chixexü̃ i chawa ngẽxmaxü̃!
13 ¡Rü choxü̃ ínapoxü̃ nax tama ngẽma chixexü̃ i nagu charüxĩnüxü̃gu changuxü̃ca̱x! ¡Rü choxü̃ rüngü̃xẽxẽ nax ngẽma chixexü̃na chixũgachixü̃ca̱x! Rü ngẽxgumarica tá nixĩ i taxũtáma chixexü̃ chaxüxü̃ rü nawa íchanguxuchixü̃ i ngẽma chixexü̃ i taxüchixü̃.
14 ¡Rü choxü̃́ nayaxu i ngẽma chorü dexagü i cumaxã nüxü̃ chixuxü̃ rü chorü ĩnügü, Pa Cori Pa Tupana ya chorü poxü̃ruxü̃ rü chorü nguxuchixẽẽruxü̃ ixĩcüx!
