Salmo 2:1-12
2 ¿Ta̱xacüca̱x nügümaxã narünuetanücüxü i nhama i naanecüã̱x i tama Tupanaxü̃ cua̱xgüxü̃? ¿Rü tü̱xcüü̃ i nügümaxã nagu narüxĩnüe i ta̱xacü i taxuwama mexü̃ nax nhuxãcü norü cua̱xmaxã Tupanaxü̃ nügü nayexeragüxü̃?
2 Rü nhama i naanecüã̱x i nachixü̃anegüarü ãẽ̱xgacügü rü Tupanamaxã rü yimá nüma yangucuchixẽẽcümaxã nanue, rü wüxigu nagu narüxĩnüe nax nhuxãcü yimáxü̃ ínata̱xüchigüxü̃.
3 Rü tagaãcü nhanagürügü: “¡Ngexrüma nax naga ixĩnüexü̃! ¡Rü ngĩxã naxme̱xwa yigü ítanguxü̃xẽxẽ nax tama natüü̃wa ingexmagüxü̃ca̱x!” nhanagürügü.
4 Notürü nüma ya Cori ya Tupana ya ãẽ̱xgacü ixĩcü i dauxü̃guxü̃ i naanewa rü nüxü̃ nacugümare.
5 Rü nhu̱xũchi norü numaxã ínanaba̱i̱xgü rü nugaãcü nayangagü rü nhanagürü nüxü̃:
6 “Chama rü marü nüxü̃ chaxuneta ya yimá ãẽ̱xgacü ya chama chanaxwa̱xecü nax namaxã inacuáxü̃ca̱x ya yima ĩane ya Yerucharéü̃ ya yima ma̱xpǘne ya üünene ya Chiã́ũwa ngexmane”, nhanagürü.
7 Rü nüma ya yimá nüxü̃ naxunetacü rü nanangãxü̃ rü nhanagürü: “Rü nhu̱xmax, Pa Chaunatüx, rü tá chanaxunagü i ngẽma cuma nagu curüxĩnüxü̃, erü cuma rü nhacurügü choxü̃: ‘Cuma rü chaune quixĩ, rü chama nixĩ i cuxü̃ chamaxẽẽxü̃ i nhu̱xmax.
8 ¡Rü choxna naxca̱x naca nax cuxme̱xwa changexmagüxẽẽxü̃ca̱x i guxü̃ma i nachixü̃anegü i nhama i naanewa ngẽxmagüxü̃ nax cuxrü yixĩxü̃ca̱x! Rü chama rü tá cuxna chanaxã.
9 ¡Rü inawe̱x i curü pora rü ngẽmamaxã nadai i ngẽma nachixü̃anegüarü ãẽ̱xgacügü nhama férumena̱xãmaxã ya buetare ya waixümünaxca̱xwa nacua̱i̱xcagurüxü̃!’ nhacurügü choxü̃.”
10 Rü ngẽmaca̱x i pemax, Pa Ãẽ̱xgacügüx ¡rü iperüxĩnüe i nhaa ucu̱xẽ rü naga pexĩnüe i nhaa pemaxã nüxü̃ chixuxü̃!
11 2:11-12 ¡Rü taãxẽãcü rü nüxü̃ pengechaü̃güãcü nüxü̃ pecua̱xüxü̃gü ya Cori ya Tupana! ¡Rü nüxü̃ pemuü̃eãcüma nape̱xegu pecaxã́pü̱xügü, rü naga pexĩnüe nax tama pemaxã nanuxü̃ca̱x, rü ngẽmaãcü namagu peyuexü̃ca̱x! Erü ngẽxguma düxwa pemaxã nanuxgu rü tá ipeyarütauxe. Notürü tataãxẽgü ya yíxema naxme̱xwa tügü ngẽxmaxẽẽgüxe.
12 Nüü̃ nadau 2:11
