Salmo 20:1-9
Yumüxẽ i nawa Tupanaarü ngü̃xẽẽca̱x íca̱xaxü̃ nax ngẽma uanüxü̃ naporamaegüxü̃ca̱x
20 ¡Rü nüma ya Cori ya Tupana cuxü̃ ĩnü, Pa Ãẽ̱xgacüx, ega guxchaxü̃wa cungexmayane cuyumüxẽgu! ¡Rü yimá Yacúarü Tupana cuxü̃ ípoxü̃ nüxna i curü uanü!
2 ¡Rü Yerucharéü̃wa ngexmane ya napatawa cuxca̱x ne nanamu i ngü̃xẽẽ nax curü uanügüpe̱xewa cuporaxü̃ca̱x!
3 ¡Rü nüxna nacua̱xãchi i curü ãmaregü, rü cuxü̃́ nanayaxu i ngẽma naxü̃nagü i naxca̱x quiguxü̃!
4 ¡Rü nüma rü cuxna nanaxã i ngẽma cuma cunaxwa̱xexü̃, rü aixcuma yanguxẽxẽ i guxü̃ma i ta̱xacü nagu curüxĩnüxü̃!
5 Rü ngẽmaãcü tá tanaxüchiga, Pa Ãẽ̱xgacüx, i ngẽxguma curü uanügüxü̃ curüporamaegu. Rü Tupanaégagu tá tanawe̱xgü ya tórü woneragü. ¡Rü Tupana yanguxẽxẽ i guxü̃ma i ngẽma nüxna naxca̱x cuca̱xaxü̃!
6 Rü chama ya ãẽ̱xgacü ya Tupana choxü̃ naxunetaxü̃ rü chayaxõ nax nüma rü tá chorü uanügüxü̃ choxü̃ naporamaexẽẽxü̃. Rü nüxü̃ chacua̱x nax nüma choxü̃ naxĩnüxü̃ i dauxü̃guxü̃ i naanewa rü tá choxü̃ nangãxü̃xü̃ rü norü poramaxã tá choxü̃ naporamaexẽẽxü̃ nüxü̃ i chorü uanügü.
7 Rü nümaxü̃ i nachixü̃anegüarü ãẽ̱xgacügü rü nüxü̃́ nangexma ya nawexü̃gü ya daiwa namaxã naxĩxü̃ne. Rü togü rü nüxü̃́ nangexma i norü cowarugü i dairuxü̃ ixĩgüxü̃. Notürü i yixema rü tüxü̃́ nangexma ya tórü ngü̃xẽẽruxü̃ nape̱xewa i tórü uanügü, rü nüma rü Cori ya Tupana nixĩ.
8 Rü ngẽma nachixü̃anegü rü tá inayayitanü rü tá inayarüxo. Notürü i yixema rü tá tanaxaixrügumagüraxü̃echa rü yexeraãcü tá taporae.
9 Pa Cori Pa Tupanax ¡naporamaexẽxẽ ya yimá torü ãẽ̱xgacü rü toxü̃́ nüxü̃ naxĩnü i torü yumüxẽ!
