Salmo 21:1-13
Nataãxẽ ya ãẽ̱xgacü erü norü uanüxü̃ narüporamae
21 Pa Cori Pa Tupanax, rü yimá ãẽ̱xgacü rü nataãxẽ erü pora nüxna cuxã. Rü poraãcü nataãxẽxü̃chi erü norü uanügüxü̃ cunaporamaexẽxẽ.
2 Rü cuma rü marü nüxna cunaxã i ngẽma norü ngúchaü̃ ixĩxü̃, rü tama nüxna cunachu̱xu i ngẽma naxca̱x cuxna naca̱xü̃.
3 Rü taãxẽãcü cunayaxu rü poraãcü nüxü̃ curüngü̃xẽẽ. Rü úirunaxca̱x i ãẽ̱xgacüarü nga̱xcueruxü̃ i naeruwa quixücuchi.
4 Rü cuxna naca nax cunamáarü maxü̃ã̱xẽẽxü̃ca̱x rü cuma rü nüxna cunaxã nax guxü̃guma nüxü̃́ nangexmaxü̃ca̱x i maxü̃.
5 Rü ngẽma curü ngü̃xẽẽgagu rü nataxüchi i norü pora ya yimá ãẽ̱xgacü. Rü cuma rü norü duü̃xü̃güpe̱xewa nüxü̃ quicua̱xüxü̃.
6 Rü guxü̃guma nüxü̃ curüngü̃xẽẽ, rü ngẽma nax naxü̃tawa cungexmaxü̃gagu rü guxü̃guma nataãxẽxü̃chi.
7 Rü cumax, Pa Ãẽ̱xgacüx, rü aixcuma Cori ya Tupanaaxü̃́ cuyaxõ, rü ngẽmaca̱x i curü uanügü rü taxũtáma cuxü̃ narüporamae, erü cuyaxõ nax cuxü̃ nangechaü̃xü̃ ya yimá guxãétüwa ngẽxmacü.
8 Rü nhu̱xmax, Pa Ãẽ̱xgacüx, rü guxü̃ma i curü uanügümaxã tá icucua̱x. Rü ngẽmaãcü cuxme̱xwa tá nangexmagü i ngẽma cuxchi aiexü̃.
9 Rü ngẽxguma cunapoxcu̱xgux, rü nhama üxüemawa ta̱xacü iguxü̃rüxü̃ tá cuyaxĩxẽxẽ. Rü nüma ya Cori ya Tupana rü tá norü numaxã üxüwa nayawocu i ngẽma curü uanügü nax ngẽxma yanaxoxü̃ca̱x.
10 Rü ngẽmaãcü i curü uanügü rü naxacügü rü nataagü rü tá icuyanaxoxẽxẽ i nhama i naanewa.
11 Rü ngẽma curü uanügü rü woo chixexü̃ cumaxã naxügüchaü̃gu, notürü taxũtáma mea nüxü̃́ ínanguxuchi i ngẽma nagu naxĩnüexü̃.
12 Erü cuma rü tá cuyabuxmüxẽxẽ erü yima curü würa rü naguama cunatoenü.
13 ¡Rü ẽcü curü poramaxã toétüwa ínayuxu, Pa Cori Pa Tupanax! Rü toma rü tá tanaxüchiga nax wiyaegümaxã cuxü̃ ticua̱xüü̃güxü̃, erü cuma rü nüxü̃ curüporamae i torü uanügü.
