Salmo 22:1-31
Ngúxü̃ yangexü̃gagu aita naxü notürü Tupanaxü̃ nicua̱xüxü̃
22 Pa Chorü Tupanax, Pa Chorü Tupanax ¿tü̱xcüü̃ choxna quixũgachi? ¿Rü tü̱xcüü̃ tama choxü̃ curüngü̃xẽẽchaü̃ rü tama nüxü̃ cuxĩnüchaü̃ i chorü axu?
2 Pa Chorü Tupanax, ngunecü rü chütacü cuxna chaca rü tama choxü̃ cungãxü̃ rü marü düxwa chipa.
3 Notürü i cumax rü cuxüüne rü torü ãẽ̱xgacü quixĩ rü ngẽmaca̱x i toma i Iraéuanecüã̱xgü rü cuxü̃ ticua̱xüxü̃gü.
4 Rü tonatügü rü cugu tayaxõgü, rü cuma rü tüxü̃ ícunguxü̃xẽxẽ naxme̱xwa i tümaarü uanügü.
5 Rü ngü̃xẽẽca̱x cuxna tacagü rü cuma rü tüxü̃ ícunguxü̃xẽxẽ. Cuxü̃́ tayaxõgü rü taguma tüxü̃ cuwomüxẽxẽ.
6 Notürü i chamax rü tama wüxi i duü̃xü̃ chixĩ, rü nhama wüxi i õxmirüü̃mare ngẽ́ma chata̱xmare. Rü duü̃xü̃güarü cugüruxü̃ chixĩ.
7 Rü ngẽma choxü̃ daugüxü̃ rü choxü̃ nacugüe rü choxna nabia̱xgü rü nanexáerugü.
8 Rü nhanagürügü: “Nhaa nixĩ i ngẽma yatü ga Cori ya Tupanaaxü̃́ yaxõxü̃. ¡Rü ẽcü rü ínanguxuchixẽxẽã̱x rü namaxẽxẽã̱x ega aixcuma nüxü̃ nangechaü̃gu!” nhanagürügü.
9 Notürü cumax, Pa Corix, nixĩ i chauéanüwa choxü̃ cunaxĩxĩchixẽẽxü̃ rü chabuxgumama choxü̃ curüngü̃xẽẽxü̃.
10 Rü yexguma tauta chabuxgu rü choxna cudau. Rü yexguma noxri chabuxgutama rü chorü Tupana quixĩ.
11 ¡Rü tauxü̃́ i choxna quixũgachixü̃! Erü ngẽmama choxna nangu i ãũcümaxü̃ rü taxúema choxü̃ ítapoxü̃.
12 Rü nhama tuirugü i Bacháü̃cüã̱x i düraexü̃rüxü̃ choxü̃ ínachomaeguãchi i chorü uanügü.
13 Rü nhama ai i norü düramaxã aita üexü̃rüxü̃ nichogü rü choxna nayuxgü.
14 Rü ngẽma chorü pora rü nhama dexá i baxü̃rüxü̃ nixĩ rü guxü̃nema ya chauxchina̱xã rü ta inagü. Rü yima chorü maxü̃ne rü nhama ta̱xacü idexe̱xü̃rüxü̃ nixĩ.
15 Rü ngẽma chorü pora rü choxna ínaxũxũ rü nhama mairaxü̃ i üa̱xcüemamaxã ipaxü̃rüxü̃ nixĩ. Rü yimá chorü conü rü chauxmanaxãwa nayaxũ̱x erü yuwa choxü̃ cutágachi.
16 Rü chorü uanügü rü nhama airugürüxü̃ choxü̃ ínachomaeguãchi i guxü̃wama rü cha̱u̱xme̱xwa rü chaucutüwa choxü̃ ínipotagü.
17 Rü ngẽma ngúxü̃ nax chingexü̃gagu rü nango̱x ya wüxichigü ya chauxchina̱xãremügü. Rü ngẽma chorü uanügü rü tama choxna ninge̱xetügü, rü choxü̃ narüdaunüecha.
18 Rü nügü nayanu ga chauxchiru rü nügümaxã naxca̱x naxĩnüca̱xwa̱xegü nax nüxü̃ nacua̱xgüxü̃ca̱x nax texégu nanguxü̃.
19 Notürü cumax, Pa Corix, nax chorü poraxẽẽruxü̃ quixĩxü̃ ¡rü tauxü̃́ i choxna quixũgachixü̃! ¡Rü paxa nua naxũ rü choxü̃ rüngü̃xẽxẽ!
20 ¡Rü choxü̃ ínapoxü̃ nax tama taramaxã choxü̃ yama̱xgüxü̃ca̱x i nhaa chorü uanügü i nhama airugürüxü̃ taxuwama mexü̃!
21 ¡Rü choxü̃ ínapoxü̃ nüxna i nhaa yatügü i nhama aigürüxü̃ rü nhama tuirugü i düraexü̃rüxü̃ ixĩgüxü̃!
22 Rü chaueneegümaxã tá cuchigaxü̃ chixu, rü curü duü̃xü̃gütanüwa tá cuxü̃ chicua̱xüxü̃.
23 Rü chama rü nhacharügü: “Guxãma ya texé ya Tupanaxü̃ ngechaü̃güxe ¡rü nüxü̃ pecua̱xüxü̃gü! Rü guxãma i pema i Iraéutanüxü̃gü i Yacútaagü ixĩgüxe ¡rü penataxẽxẽ!” nhachagürü.
24 Erü nüma ya Cori ya Tupana rü taguma tüxü̃ inarüngüma ya yíxema ngúxü̃ ingegüxe rü taguma tümacha̱xwa inicu̱x. Rü nüma ya Tupana rü tüxü̃ naxĩnü ega ngẽxguma nüxna icaxgux, rü tüxü̃ narüngü̃xẽẽ.
25 Rü ngẽmaca̱x, Pa Cori Pa Tupanax, rü tá cuxü̃ chicua̱xüxü̃ nape̱xewa i ngẽma curü duü̃xü̃gü. Rü tá nüxü̃ chixu nax quixaixcumaxü̃. Rü nape̱xewa i ngẽma duü̃xü̃gü i cuxü̃ taxẽẽgüxü̃ rü tá chayanguxẽxẽ i ngẽma cumaxã ichaxunetaxü̃.
26 Rü pema i togü chixri pemaxã cua̱xgüxe ¡rü meama pechibüe rü nhu̱xmata mea pexü̃́ yangu! Rü pema i Tupanaca̱x daugüxe ¡rü nüxü̃ pecua̱xüxü̃gü! ¡Rü namá i perü maxü̃!
27 Rü Pa Guxãma ya Duẽxẽgü i Nhama i Naanewa Maxẽxe ¡rü nüxna pecua̱xãchie ya Cori ya Tupana rü naxca̱x pexĩ! ¡Rü nape̱xegu pecaxã́pü̱xügü rü nüxü̃ pecua̱xüxü̃gü!
28 Erü nüma ya Cori ya Tupana rü ãẽ̱xgacü nixĩ rü guxü̃ i nachixü̃anegümaxã inacua̱x.
29 Rü guxü̃ma i ngẽma diẽruã̱xgüxü̃ rü name nixĩ nax Cori ya Tupanape̱xegu nacaxã́pü̱xügüxü̃ nax nüxü̃ yacua̱xüü̃güxü̃ca̱x. Erü guxü̃ma i ngẽma nhama i naanewa maxẽxü̃ rü wena tá waixümüxü̃ nixĩgü, erü nügüwatama rü nataxuma i maxü̃.
30 Rü ngẽma tawena ngóexü̃ i duü̃xü̃gü rü tá Cori ya Tupanaxü̃ nicua̱xüxü̃gü rü nüxü̃ nixuchigagü.
31 Rü woo ngẽma duü̃xü̃gü i ngẽmawena buexü̃ rü tá nüxü̃ naxĩnüechiga ga yema taxü̃ ga mexü̃gü ga Cori ya Tupana norü poramaxã üxü̃.
