Salmo 24:1-10
Tupana nixĩ ya ãẽ̱xgacü ya üünecü
24 Rü Cori ya Tupanaarü nixĩ i guxü̃ma i nhaa naane, rü guxü̃ma i nawa ngẽxmagüxü̃ rü nawa maxẽxü̃.
2 Yerü nüma nixĩ ga naxüãxü̃ ga nhama ga naane. Rü nüma nixĩ ga naxüchicaãxü̃ ga márgü rü taxtügü nax yemaacü nangóxü̃ca̱x ga paanexü̃.
3 ¿Rü texé tame nax nawa tanguxü̃ ya yima ma̱xpǘne ya üünene i Tupana íngexmaxü̃wa? ¿Rü texé tame nax napata ya üünenewa tamaxü̃xü̃?
4 Rü tüma tixĩ ya yíxema taguma chixexü̃ ǘxe rü taguma tümãẽwa chixexü̃gu rüxĩnüxe, rü taguma tupananetachicüna̱xãgüxü̃ icua̱xüü̃xü̃güxe rü taguma idoraxe.
5 Rü Cori ya tümaarü Tupana ya tümaarü maxẽẽruxü̃ rü tá mexü̃ tümamaxã naxuegu rü tá tüxü̃ narüngü̃xẽẽ.
6 Rü ngẽmaãcü tanaxwa̱xe nax tamaxẽxü̃ ya yíxema Yacúarü Tupanaca̱x daugüxe nax tümaxü̃tawa nangexmaechaxü̃ca̱x.
7 ¡Rü piwãxnagü, Pa Nũxcümaxü̃xü̃ i Yerucharéü̃arü Ĩã̱xgüx, pengeenügü nax yaxücuxü̃ca̱x ya yimá guxãarü ãẽ̱xgacü ya üünecü ya poracü!
8 ¿Rü texé nixĩ ya yimá ãẽ̱xgacü ya üünecü? Rü nüma nixĩ ya Cori ya Tupana ya poracü rü tama muü̃cü. Rü aixcuma nüma ya Cori ya Tupana nixĩ ya taxuxü̃ma muü̃cü ega ngẽxguma texémaxã nügü nadaixgux.
9 ¡Rü piwãxnagü, Pa Nũxcümaxü̃xü̃ i Yerucharéü̃arü Ĩã̱xgüx, rü pengeenügü nax yaxücuxü̃ca̱x ya yimá ãẽ̱xgacü ya üünecü ya poracü!
10 ¿Rü texé nixĩ ya yimá ãẽ̱xgacü ya üünecü ya poracü? Rü nüma nixĩ ya Cori ya Tupana ya guxãétüwa ücü. Rü nümatama nixĩ ya ãẽ̱xgacü ya aixcuma üünecü ya poracü.
