Salmo 25:1-22
Yumüxẽ i nawa Tupanaarü ngü̃xẽẽca̱x íca̱xaxü̃
25 Pa Cori Pa Tupanax, rü cuxna nixĩ i chaca̱xaxü̃.
2 Pa Chorü Tupanax, cuxü̃́ chayaxõ. ¡Rü tauxü̃́ i cunaxüchicaxü̃ i chorü uanügü nax ãne choxü̃ yangexẽẽgüxü̃ca̱x rü choxü̃ nacugüexü̃ca̱x!
3 Rü tama chanaxwa̱xe nax texé ãne tüxü̃ ingexẽẽxü̃ ya yíxema cuxü̃́ yaxõgüxe. Notürü i ngẽma tama cuga ĩnüexü̃ rü cumaxã nuexü̃, rü name nixĩ i ãne nüxü̃ quingegüxẽxẽ.
4 Pa Corix ¡choxü̃ nawe̱x i cumaxü̃ rü ngẽmagu choxü̃ ixũxẽxẽ!
5 ¡Rü chamaxã inacua̱x rü choxü̃ nangu̱xẽxẽ i ngẽma curü ore i aixcuma ixĩxü̃! Erü cuma nixĩ i chorü Tupana rü chorü maxẽẽruxü̃ quixĩxü̃. Rü guxü̃ma i oragu rü cugu chayaxõ.
6 Pa Cori Pa Tupanax ¡nüxna nacua̱xãchi nax nhuxãcü guxü̃gumachire̱x toxü̃ cungechaü̃xü̃ rü cuxü̃́ tangechaü̃tümüxü̃güxü̃!
7 ¡Notürü tauxü̃́ i nüxna cucua̱xãchixü̃ i chorü chixexü̃gü rü yema chixexü̃ ga chaxüxü̃ ga yexguma changextü̱xügu! Pa Cori Pa Tupanax ¡choxna nacua̱xãchi erü ngẽma curü ngechaü̃ rü curü mecüma rü nata!
8 Rü nüma ya Cori ya Tupana rü namecüma rü aixcumacü nixĩ. Rü nüma rü tüxü̃ narüwe̱xãchixẽxẽ ya yíxema chixri maxẽxe.
9 Rü namaxü̃gu tüxü̃ naxĩxẽxẽ ya yíxema tama tügü icua̱xüü̃güxe, rü mexü̃wa tüxü̃ nagagü.
10 Rü ngẽxguma naga ixĩnüegu i norü mugü rü mea yanguxẽẽgu i ngẽma uneta i namaxã ixüxü̃, rü nüma rü tüxü̃ nangechaü̃ãcüma tüxü̃ naxucu̱xẽ namaxã i norü ore i aixcuma ixĩxü̃.
11 Pa Cori Pa Tupanax, nata i chorü chixexü̃ i cupe̱xewa chaxüxü̃ ¡Rü choxü̃́ nüxü̃ irüngüma i ngẽma nax taxúema chixri cuchiga idexaxü̃ca̱x!
12 Rü yíxema Cori ya Tupanaxü̃ ngechaü̃xe, rü nüma rü tá tüxü̃ nanawe̱x i nama i mexü̃ nax nagu tixũxü̃.
13 Rü tá tüxü̃ narüngü̃xẽẽ rü tümaxacügüme̱xẽgu nanaxǘ i nhaa nachixü̃ane nax namaxã inacua̱xgüxü̃ca̱x.
14 Rü nüma ya Cori ya Tupana rü yíxema nüxü̃ ngechaü̃güxemücü nixĩ, rü meama tümaca̱x nanango̱xẽxẽ i ngẽma norü uneta.
15 Rü guxü̃guma Cori ya Tupanaarü ngü̃xẽẽca̱x chadau erü nüma nixĩ i choxü̃ ínapoxü̃xü̃ nawa i guxü̃ma i ãũcümaxü̃.
16 Pa Corix ¡choxü̃ rüngü̃xẽxẽ rü cuxü̃́ changechaü̃tümüxü̃! Erü chatura rü taxü̃ i guxchaxü̃wa changexma.
17 Chama rü yexera chanaxi̱xãchiãẽchigü. ¡Rü nawa choxü̃ ínanguxuchixẽxẽ i nhaa ngúxü̃ i chingexü̃!
18 ¡Choxü̃́ nüxü̃ nadau i chorü guxchaxü̃gü rü nhaa ngúxü̃ ichingexü̃ rü choxü̃́ íyanaxoxẽxẽ! ¡Rü choxü̃́ nüxü̃ yarüngüma i chorü chixexü̃gü!
19 ¡Rü dücax i nhuxre i chorü uanügü i choxü̃ ima̱xgüchaü̃xü̃!
20 ¡Rü choxna nadau rü choxü̃ ínapoxü̃ nax tama choxü̃ yama̱xgüxü̃ca̱x! ¡Rü tauxü̃́ i cunaxüchicaxü̃ i chorü uanügü nax ãne choxü̃ yangexẽẽgüxü̃ca̱x! Erü cuma nixĩ i chorü poxü̃ruxü̃ quixĩxü̃, rü cuxü̃tagu nixĩ i nüxü̃ ichayanga̱u̱xü̃ i ngü̃xẽẽ.
21 Rü ngẽma chaugü namaxã íchapoxü̃xü̃ nixĩ nax aixcumaxü̃ chixuxü̃ rü taxuxü̃ma i chixexü̃ chaxüxü̃. Rü ngẽmaãcü chamaxü̃ erü cugu chayaxõ.
22 Pa Tupanax ¡ínapoxü̃ i guxü̃ma i chautanüxü̃gü i Iraéuanecüã̱xgü nawa i torü guxchaxü̃gü!