Salmo 26:1-12
Yimá norü maxü̃maxã mea icúacüarü yumüxẽ
26 Pa Cori Pa Tupanax ¡choxü̃ rüngü̃xẽxẽ! Erü chorü maxü̃wa rü nataxuma i chixexü̃. Rü aixcuma cugu chayaxõ, Pa Cori Pa Tupanax.
2 ¡Rü ẽcü choxü̃ nangugü! ¡Rü choxü̃ naxü! ¡Rü nüxü̃ naxü i chorü ĩnü rü chorü ngúchaü̃ i chaxica nüxü̃ chacuáxü̃!
3 Chama rü nagu charüxĩnü nax choxü̃ cungechaü̃xü̃, rü guxü̃guma meama cuga chaxĩnü.
4 Rü taguma namaxã chaxãmücü i ngẽma idorata̱a̱xgüxü̃ rü bai i nhuxgu wüxiwa namaxã changexma i ngẽma duü̃xü̃güpe̱xewa mexü̃ ügünetaxü̃.
5 Rü choxü̃́ nawa̱xtümüxü̃ i norü ngutaque̱xe i ngẽma chixexü̃ ügüxü̃ i duü̃xü̃gü. Rü taguma namaxã chaxãmücü i ngẽma duü̃xü̃gü i chixecümaxü̃.
6 26:6-7 Rü cupe̱xewa chaugü chayauxme̱x nax ngẽmaãcü cuxü̃ chawéxü̃ca̱x nax chawa rü nataxuxü̃ma i ta̱xacürü chixexü̃. Rü ngẽmaãcü, Pa Cori Pa Tupanax, curü ãmarearü guchicaxü̃wa changu nax cuxca̱x chawiyaexü̃ca̱x rü cuxü̃ chicua̱xüüxü̃ca̱x naxca̱x i ngẽma mexü̃gü i cuxüxü̃.
7 Nüü̃ nadau 26:6
8 Pa Corix, chama rü nüxü̃ changechaü̃ ya yima cupata ya nawa curü üünemaxã cungexmane.
9 Rü tama chanaxwa̱xe i choxü̃ quima̱x wüxigu namaxã i ngẽma pecáduã̱xgüxü̃. Rü tama chanaxwa̱xe i ngẽma máetagüxü̃rüxü̃ chamaxã quixĩ.
10 Rü tama chanaxwa̱xe i ngẽma chixexü̃ ügüxü̃rüxü̃ rü ngẽma ãẽ̱xgacügü i diẽruca̱x chixri duü̃xü̃gümaxã icua̱xgüxü̃rüxü̃ chamaxã quixĩ.
11 Erü chorü maxü̃ rü taxuwama nachixe ¡rü ngẽmaca̱x choxü̃ rüngü̃xẽxẽ rü cuxü̃́ changechaü̃tümüxü̃!
12 Rü cumax, Pa Corix, rü taianexü̃gu choxü̃ cuchixẽxẽ nax tama chorü uanügüme̱xẽgu changuxü̃ca̱x. Rü ngẽmaca̱x guxü̃ i duü̃xü̃güpe̱xewa tá cuxü̃ chicua̱xüxü̃ rü mexü̃ cumaxã chaxuegu.
