Salmo 27:1-14
Cori ya Tupana rü chorü omü rü chorü maxẽẽruxü̃ nixĩ
27 Rü nüma ya Cori ya Tupana rü chorü omü rü chorü maxẽẽruxü̃ nixĩ. ¿Rü ngẽmaca̱x rü texéxü̃ tá nixĩ i chamuü̃xü̃? Rü nüma ya Cori ínanapoxü̃ i chorü maxü̃. ¿Rü nhu̱xmax rü texéxü̃ tá nixĩ ichamuü̃xü̃?
2 Rü ngẽxguma chixexü̃gü i chorü uanügü cha̱u̱xca̱x ibuxmügu nax choxü̃ yama̱xgüxü̃ca̱x, rü nüxchama tá guxchaxü̃gu nayi.
3 Rü woo muxũchixü̃ i chorü uanügü choxü̃ íchomaeguãchigu rü taxuca̱xtáma chamuü̃. Rü woo nügü ínamexẽẽgügu nax cha̱u̱xca̱x íyaxüãchixü̃ca̱x rü taxuca̱xma chanaxi̱xãchiãxẽ erü nüxü̃ chacua̱x nax nüma ya Tupana tá choxü̃ ípoxü̃xü̃.
4 Rü ngẽma Cori ya Tupanana naxca̱x chaca̱xü̃ rü choxü̃́ ngúchaü̃xü̃ rü wüxitama nixĩ. Rü ngẽma nixĩ nax guxü̃ma i chorü maxü̃gu Cori ya Tupanapatawa changexmaxü̃ nax ngẽmaãcü nüxü̃ chicua̱xüüxü̃ca̱x rü norü üünemaxã chataãxẽxü̃ca̱x.
5 Rü ngẽxguma guxchaxü̃ cha̱u̱xca̱x ínguxgu rü nüma ya Cori rü napatawa tá choxna nadau. Rü nügümaxã tá choxü̃ natüxchipeta rü wüxi ya nuta ya tacüétügu tá choxü̃ namunagü nax taxuxü̃ma choxü̃ imáxü̃ca̱x.
6 Rü ngẽ́ma rü taxuxü̃táma i chorü uanü choxna nangu. Rü ngẽxguma rü tá choxü̃́ natauxcha nax Cori ya Tupanaca̱x chayaguxü̃ i ãmaregü i napatawa rü taãxẽãcüma naxca̱x chawiyaexü̃ rü nüxü̃ chicua̱xüüxü̃.
7 Rü cuxna nixĩ i chaca̱xaxü̃, Pa Corix. ¡Rü choxü̃ naxĩnü! ¡Rü cuxü̃́ changechaxü̃tümüxü̃ rü choxü̃ nangãxü̃!
8 Rü chauãẽwa rü nagu charüxĩnü rü chaugü nhachagürü: “Cori ya Tupanaca̱x tá chadau”, nhachagürü. Rü ngẽmaca̱x i chamax, Pa Corix, rü cuxca̱x chadau.
9 ¡Rü tauxü̃́ i cha̱u̱xcha̱xwa iquicúxü̃ rü tauxü̃́ i curü numaxã choxü̃ cuxoxü̃! Erü cuxicatama nixĩ i chorü ngü̃xẽẽruxü̃ quixĩxü̃. ¡Rü tauxü̃́ i chaxica nua choxü̃ cutáxü̃ nax ngẽmaãcü changemücüxü̃ca̱x! Erü cuma nixĩ ya chorü Tupana rü chorü maxẽẽruxü̃ quixĩxü̃.
10 Rü woo chaunatü rü chaué choxü̃ íta̱xgügu notürü cumax, Pa Corix, tá nixĩ i choxna cudauxü̃.
11 Pa Corix ¡choxü̃ nawe̱x i cumaxü̃ rü chorü uanügücha̱xwa choxü̃ nüxü̃ nacua̱xẽxẽ i ngẽma mexü̃ i nama nax nagu chixũxü̃ca̱x!
12 ¡Rü tauxü̃́ i norü ngúchaü̃wa choxü̃ cutáxü̃! Erü ngẽma duü̃xü̃gü i choxü̃ ima̱xgüchaü̃xü̃ rü chixri chauchiga nidexagü, notürü guxü̃ma i ngẽma rü doragümare nixĩ.
13 Notürü i chama rü chayaxõ nax nüxü̃ tá chadauxü̃ nax nhuxãcü choxü̃ nangechaü̃xü̃ ya Cori ya Tupana i guxü̃ma i ngunexü̃gü i nagu chamaxü̃xü̃wa.
14 ¡Ẽcü nüxü̃́ yaxõ ya Cori! ¡Rü cugü naporaxẽxẽ rü tauxü̃́ i nüxü̃ curüxoxü̃ nax cuyaxõxü̃! Rü cumaxã nüxü̃ chixu rü ¡nagu yaxõ ya Cori ya Tupana!
