Salmo 28:1-9
Cori ya Tupana rü nüxü̃ naxĩnü i tórü yumüxẽ
28 Pa Cori Pa Tupana Pa Chorü Poxü̃ruxü̃x, rü cuxna nixĩ i chaca̱xü̃. ¡Rü tauxü̃́ i cha̱u̱xcha̱xwa iquicúxü̃ nax tama choxü̃ cungãxü̃xü̃ca̱x! Erü ngẽxguma taxũtáma choxü̃ cungãxü̱̃xgu rü tá chayu.
2 ¡Rü choxü̃ naxĩnü i ngẽxguma cupata íngexmaxü̃gu chawéxme̱xãcüma curü ngü̃xẽẽca̱x íchaca̱xgu!
3 Rü tama chanaxwa̱xe i choxü̃ cupoxcu wüxigu namaxã i ngẽma chixexü̃ ügüxü̃. Rü nümagü rü mea tümamaxã naxãmücügüneta ya duẽxẽgü, notürü naãxẽwa rü nagu narüxĩnüe nax nhuxãcü tüxü̃ yama̱xgüchaü̃xü̃.
4 Rü ngẽmaca̱x, Pa Corix, rü name nax cunapoxcuexü̃ naxca̱x i ngẽma norü chixexü̃ i naxügüxü̃. ¡Rü ngẽma chixexü̃ i to̱xguã̱xmaxã naxügüxü̃tama naxca̱x natáeguxẽxẽ nax ngẽmatama i chixexü̃maxã cupoxcuexü̃ca̱x!
5 Rü nümagü rü tama Tupanaxü̃ nacua̱xgüchaü̃ rü tama nüxü̃ nacua̱xgüchaü̃ i ngẽma Tupana ngo̱xẽẽxü̃. Rü ngẽmaca̱x ya Tupana rü tá nanadai rü tagutáma wena inanachigüxẽxẽ.
6 Rü namecümaxü̃chi ya Cori ya Tupana erü nüxü̃ naxĩnü i chorü yumüxẽ.
7 Rü nüma ya Cori ya Tupana rü chorü poxü̃ruxü̃ ya poraxüchicü nixĩ. Rü nagu nixĩ ga chayaxõxü̃ rü nüma nixĩ ga choxü̃ nangü̃xẽẽxü̃. Rü poraãcü chataãxẽ i nhu̱xmax. Rü ngẽmaca̱x tá Cori ya Tupanaca̱x chawiyae rü tá moxẽ nüxna chaxã.
8 Rü nüma ya Cori ya Tupana nixĩ i norü duü̃xü̃güxü̃ naporaexẽẽxü̃. Rü nüma nixĩ i nüxü̃ nangü̃xẽẽxü̃ rü ínapoxü̃ãxü̃ ya yimá ãẽ̱xgacü ya nümatama nüxü̃ naxunetacü.
9 Pa Cori Pa Tupanax ¡nüxü̃ rüngü̃xẽxẽ ya curü duü̃xü̃gü rü mexü̃ namaxã naxuegu! ¡Rü nhama wüxi i carnéruarü daruü̃rüxü̃ nüxna nadau rü guxü̃guma mea yagagü!
