Salmo 3:1-8
Dawí rü norü yumüxẽwa Tupanaarü ngü̃xẽẽca̱x ínaca
3 Pa Corix, namuxũchi i chorü uanügü rü namuxũchi i ngẽma chauxchi aiexü̃.
2 Rü namuxũchi i ngẽma chauchigagu nhagüxü̃: “Tupana rü taxũtáma ínanapoxü̃”, nhagüxü̃.
3 Notürü cumax, Pa Corix, rü chorü poxü̃ruxü̃ quixĩ. Rü cuma nixĩ i choxü̃ cuporaxẽẽxü̃ nax nüxü̃ charüporamaexü̃ca̱x i chorü uanügü.
4 Rü Cori ya Tupanaca̱x aita chaxü nax choxü̃ nangü̃xẽẽxü̃ca̱x. Rü nüma rü choxü̃ naxĩnü ya yima napata ya ma̱xpǘne ya Chiã́ũwa ngexmanewa, rü choxü̃ nangãxü̃.
5 Rü ngẽmaca̱x ngẽxguma ichaca̱xgu rü mea chape, rü taãxẽãcü chaba̱i̱xãchi erü nüma ya Cori ya Tupana rü choxna nadau.
6 Rü tama namaxã chaba̱i̱xãchi i nhaa muxũchixü̃ i chorü uanügü i choxü̃ íchomaeguãchixü̃ nax choxü̃ yama̱xgüxü̃ca̱x.
7 Pa Corix, Pa Chorü Tupanax ¡chauxétüwa ínayuxu rü choxü̃ ínapoxü̃ nüxna i nhaa chorü uanügü! Rü cuma tá nixĩ i nachiwewa tá quimáxü̃ rü cunabüü̃pütaxü̃ i ngẽma chorü uanügü i chauxchi aiexü̃.
8 Rü cuma nixĩ, Pa Corix, i ãũcümaxü̃wa toxü̃ ícunguxü̃xẽẽ̱xü̃. ¡Rü mexü̃ namaxã naxuegu i curü duü̃xü̃gü!
