Salmo 30:1-12
Dawí rü Cori ya Tupanaxü̃ ticua̱xüxü̃ erü norü da̱xawewa naxca̱x nayataanexẽxẽ
30 Pa Cori Pa Tupanax, rü cuxü̃ chicua̱xüxü̃ erü cuma nixĩ i chorü da̱xawewa choxü̃ ícurüdaxẽẽamaxü̃ rü ngẽmaca̱x tama chayu. Erü cuma rü tama cunaxwa̱xe nax choxü̃ nacugüexü̃ i chorü uanügü.
2 Pa Cori Pa Chorü Tupanax, chama rü cuxü̃tawa naxca̱x íchaca i curü ngü̃xẽẽ, rü cuma rü choxü̃ cungãxü̃ga rü cha̱u̱xca̱x cuyataanexẽxẽ.
3 Rü nawa choxü̃ ícunguxuchixẽxẽ i ngẽma yu rü choxü̃ cumaxẽẽama. Rü ngẽmaca̱x tama chayu.
4 Rü ngẽmaca̱x i pemax, Pa Chamücügü i aixcuma Cori ya Tupanaaxü̃́ Yaxõgüxü̃ ¡rü ngĩxã wüxigu Tupanaca̱x tawiyaegü rü nüxü̃ ticua̱xüxü̃gü ya yimá üünecü!
5 Erü ngẽma norü nu rü paxaãchimare nixĩ, notürü ngẽma norü ngü̃xẽẽ rü taguma inayagu̱x. Rü woo chütacü ixauxegu, notürü moxü̃ãcü rü taãxẽãcü tingunexü̃gü.
6 Rü chama rü yexguma taxũta chida̱xawegu rü chaugügu charüxĩnü rü nhachagürü: “Nhu̱xma rü marü taxuxü̃táma i ta̱xacü choxü̃ nangupetü”, nhachagürü.
7 Notürü i cuma rü choxü̃ cuxü, rü choxna quixũgachi rü tama choxü̃ curüngü̃xẽẽ. Rü ngẽmaca̱x chorü muü̃maxã chaba̱i̱xãchiãxẽ. Notürü yemawena rü chamaxã cumecüma, rü cha̱u̱xca̱x cuyataanexẽxẽ.
8 Rü cuxna nixĩ i chaca̱xü̃, Pa Cori Pa Tupanax, rü cuxü̃ nixĩ i chachixewexü̃.
9 Rü nhachagürü: “Pa Cori Pa Tupanax ¿rü ta̱xacüwa namexü̃ ega ta̱xwa choxü̃ nangegügu? Erü wüxi i waixümü rü taxucürüwa cuxü̃ nicua̱xüxü̃ rü taxucürüwa nüxü̃ nixu nax cuma rü aixcumacü quixĩxü̃”, nhachagürü.
10 Pa Cori Pa Tupanax ¡cuxü̃́ changechaxü̃tümüxü̃ rü choxü̃ naxĩnü rü choxü̃ rüngü̃xẽxẽ!
11 Rü nhu̱xmax nax cha̱u̱xca̱x cuyataanexẽẽxü̃ rü ngẽma chorü ngechaü̃ rü taãxẽxü̃ choxü̃́ cuyanguxuchixẽxẽ. Rü ngẽmaãcü choxna cuyaxũgachixẽxẽ i ngẽma chorü ngechaü̃ rü nhu̱xmachi taãxẽ choxna cuxã.
12 Rü nhu̱xmax, Pa Cori Pa Tupanax, rü taxucürüwama charüngea̱xmare. Rü ngẽmaca̱x wiyaegümaxã tá cuxü̃ chicua̱xüxü̃ rü guxü̃gutáma moxẽ cuxna chaxã.
