Salmo 31:1-24
Name nax aixcuma Tupanagu nax yaxõxü̃
31 Pa Cori Pa Tupanax, cuxü̃tagu nixĩ i chaugü charücúxü̃ nax choxü̃ ícupoxü̃xü̃ca̱x nax tama choxü̃ yama̱xgüxü̃ca̱x i chorü uanügü. ¡Rü tauxü̃́ i nüxü̃ icurüngümaxü̃ ega curü ngü̃xẽẽca̱x íchaca̱xgux! ¡Rü choxü̃ ínanguxuchixẽxẽ naxme̱xwa i chorü uanügü! Erü cuma rü Tupana ya aixcuma mecü quixĩ.
2 ¡Rü ẽcü choxü̃́ nüxü̃ naxĩnü i chorü yumüxẽ! ¡Rü paxa nua naxũ rü naxme̱xwa choxü̃ ínanguxuchixẽxẽ i chorü uanügü! Rü chanaxwa̱xe i chorü poxü̃ruxü̃ nax quixĩxü̃ i cumax, rü chanaxwa̱xe nax chorü cu̱xchicaxü̃ nax quixĩxü̃ nax tama choxü̃ yama̱xgüxü̃ca̱x.
3 Rü cuma nixĩ i chorü poxü̃ruxü̃ rü chorü cu̱xchicaxü̃. ¡Rü chamaxã inacua̱x rü choxna nadau naxcha̱xwa i chorü uanügü! Rü ngẽmaãcü i nümagü rü tá nüxü̃ nacua̱xgü nax aixcuma Tupana ya poracü nax quixĩxü̃.
4 ¡Rü choxü̃ ínanguxuchixẽẽama nawa i ngẽma guxchaxü̃ i cha̱u̱xca̱x inaxǘgüxü̃! Erü cuma nixĩ i chorü poxü̃ruxü̃ quixĩxü̃.
5 Rü cuxme̱xwa chanange̱x i chorü maxü̃. ¡Rü choxü̃ ínanguxuchixẽxẽ, Pa Cori Pa Tupana ya Ixaixcumacüx!
6 Rü tama namaxã chataãxẽ i ngẽma duü̃xü̃gü i naxchicüna̱xãgü i taxuwama mexü̃xü̃ icua̱xüü̃güxü̃. Erü cugu nixĩ i chayaxõxü̃, Pa Cori Pa Tupanax.
7 Rü ngẽma choxü̃ nax cungechaü̃xü̃ca̱x rü chataãxẽ rü mexü̃gu charüxĩnü. Rü cuma rü nüxü̃ cucua̱x nax ngechaü̃ chingexü̃ rü chanaxi̱xãchiãẽxü̃.
8 Notürü tama chorü uanüme̱xẽgu choxü̃ cunguxẽxẽ. Rü cha̱u̱xca̱x cunamexẽxẽ i wüxi i nachica i nüxü̃́ guxchaxü̃ nax choxna nangugüxü̃.
9 Pa Cori Pa Tupanax ¡cuxü̃́ changechaxü̃tümüxü̃x! Erü ãũcümaxü̃wa changexma i nhu̱xmax. Rü ngẽma ngúxü̃ nax chingexü̃ca̱x rü changu̱xetü rü changu̱xune rü guxü̃wama choxü̃́ nangu̱x.
10 Rü ngẽma nax ngúxü̃ chingexü̃ rü nax changechaü̃xü̃gagu rü tá paxa chayu. Rü ngẽma nax ngechaü̃ chingexü̃gagu rü chiturachigü. Rü ngẽmaca̱x i chaxune rü natura.
11 Rü chama rü norü cugüruxü̃ chixĩ i ngẽma chorü uanügü. Rü ngẽma chorü ngaicamagu ãchiü̃güxü̃ i duü̃xü̃gü rü norü ĩnücaruü̃mare choxü̃ nixĩgüxẽxẽ. Rü ngẽma choxü̃ cua̱xgüxü̃ i duü̃xü̃güca̱x rü wüxi i ãũãchixü̃ chixĩ. Rü ngẽxguma ĩtamüwa choxü̃ nadaugügu rü cha̱u̱xcha̱xwa nibuxmü.
12 Rü choxü̃ inarüngümaexü̃chima rü nhama marü chayuxü̃rüxü̃ choxü̃ nadau. Rü ngẽmaãcü nhama wüxi i axepáxü̃ i puxãchixü̃rüxü̃ chixĩ.
13 Rü duü̃xü̃gü rü bexma choxü̃ nixugüechamare chixexü̃maxã. Rü ngexta íchadawenüxü̃wa rü nangexma i ãũcümaxü̃ rü poraãcü chamuü̃. Rü duü̃xü̃gü rü wüxigu nagu narüxĩnüe nax nhuxãcü choxü̃ yama̱xgüchaü̃xü̃.
14 Notürü i chamax, Pa Cori Pa Tupanax, rü cugu chayaxõ rü nhachagürü: “Rü cuma nixĩ i chorü Tupana quixĩxü̃”, nhachagürü.
15 Rü nhaa chorü maxü̃ rü cuxme̱xwa nangexma. Rü ngẽmaca̱x chanaxwa̱xe i naxme̱xwa choxü̃ ícunguxuchixẽxẽ i ngẽma chorü uanügü i chauxchi aiexü̃.
16 Rü chama nax curü duü̃xü̃ chixĩxü̃ ¡rü cuxü̃́ changechaxü̃tümüxü̃! ¡Rü ẽcü choxü̃ ínanguxuchixẽxẽ erü choxü̃ cungechaü̃!
17 Pa Cori Pa Tupanax, rü cuxna nixĩ ichaca̱xü̃. Rü chanaxwa̱xe i choxü̃ cungãxü̃ga nax tama ãne chingexü̃ca̱x. Notürü ngẽma chixexü̃ ügüxü̃ i duü̃xü̃gü rü name nixĩ i ãne nüxü̃ quingexẽẽxü̃. ¡Rü ẽcü noxtacüma naxmaxü̃ i chianexü̃ i tauquewa ngẽxmaxü̃wa namugü!
18 Rü ngẽmaãcü tá narüchianegü i ngẽma duü̃xü̃gü i dorata̱a̱xgüxü̃ i cugüwa̱xegüxü̃ rü to̱xguã̱xü̃ oexü̃ rü guxchigawa̱xegüxü̃ tümamaxã ya yíxema mexe ya duü̃xẽgü.
19 Pa Tupanax, cuma rü poraãcü cumecüma tümamaxã ya yíxema cuga ĩnüexe. Rü duü̃xü̃güpe̱xewa cunawe̱x nax nhuxãcü cumecümaxü̃ tümamaxã ya yíxema cugu yaxõgüxe.
20 Rü cuma rü tüxü̃ ícupoxü̃ nüxna i ngẽma duü̃xü̃gü i chixexü̃gu rüxĩnüexü̃. Rü cugütüü̃wa tüxü̃ cungexmagüxẽxẽ nax ngẽmaãcü tama tümamaxã naguxchigagüxü̃ca̱x i tümaarü uanügü.
21 Rü cumexechi, Pa Cori Pa Tupanax. Erü choxü̃ nax cungechaü̃xü̃gagu taxü̃ i mexü̃ cha̱u̱xca̱x cuxü ga yexguma ngúxü̃ chingeyane.
22 Rü ngẽxguma guxchaxü̃wa changexmayane rü nagu charüxĩnü nax choxna quixũgachixü̃. Notürü yexguma cuxna chaca̱xgu nax choxü̃ curüngü̃xẽẽxü̃ca̱x rü cuma rü choxü̃ cuxĩnü nax aita cuxca̱x chaxüxü̃.
23 Pa Guxãma i Pema i Cori ya Tupanaaxü̃́ Yaxõgüxex ¡rü nüxü̃ pengechaxü̃güx! Erü nüma ya Cori rü tüxna nadau ya yíxema naga ĩnüexe. Notürü ngẽma tama naga ĩnüexü̃ rü tá poraãcü nanapoxcue.
24 Rü guxãma i pema i Cori ya Tupanagu nax peyaxõgüxü̃ ¡rü peporae rü petaãxẽgü!
