Salmo 33:1-22
33 Rü pemax, Pa Duü̃xü̃gü i Tupanaga Ĩnüexü̃x ¡rü nüxü̃ pecua̱xüxü̃gü! Erü nüma ya Tupana rü namaxã nataãxẽ i norü duü̃xü̃güarü cua̱xüxü̃.
2 ¡Rü moxẽ nüxna pexãgü ya Cori ya Tupana! ¡Rü árpamaxã rü árpaxacümaxã taãxẽãcü naxca̱x pewiyaegü!
3 ¡Rü ngexwaca̱xü̃xü̃ i wiyaegu pewiyaegü! ¡Rü mea pepaxetagüãcüma nüxü̃ pecua̱xüxü̃gü!
4 Rü ngẽma Cori ya Tupanaarü ore rü aixcuma name. Rü ngẽma naxüxü̃wa nango̱x nax nüma rü aixcuma yanguxẽẽãxü̃ i ngẽma nüxü̃ yaxuxü̃.
5 Rü nüma ya Cori ya Tupana rü namaxã nataãxẽ i ngẽma aixcuma ixĩxü̃ rü ngẽma we̱xguxü̃. Rü ngẽma norü ngechaü̃ rü nhama i naane namaxã nanapá.
6 Rü ngẽma dauxü̃guxü̃ i naane rü guxü̃ma i ngẽ́ma ngẽxmagüxü̃ rü nüma ga Cori ya Tupana rü norü dexamaxã nanaxü rü naétü “cue”, nhanagürü.
7 Rü nüma ga Tupana rü nanaxü ga yema taxü̃ ga már i mátamaxü̃. Rü yema norü dexá rü wüxitama ga nachicawa nanayexmaxẽxẽ.
8 Pa Guxü̃ma i Ta̱xacü i Nhama i Naanewa Ngẽxmagüxü̃x ¡rü Tupanaga pexĩnüe! Rü guxãma i pemax, Pa Nhama i Naanecüã̱x i Duü̃xü̃güx ¡rü nüxü̃ pengechaxü̃gü!
9 Yerü nüma rü norü dexamaxã guxü̃ma naxü. Rü nanamu rü guxü̃ma mea inanu.
10 Rü nüma ya Cori ya Tupana rü nagu nayanaxoxẽxẽ i ngẽma nagu naxĩnüexü̃ i ngẽma duü̃xü̃gü i tama nüxü̃́ yaxõgüxü̃.
11 Notürü i ngẽma nüma ya Cori ya Tupana nagu rüxĩnüxü̃ rü guxü̃guma nanaxa̱ixrügumaraxü̃ rü taguma narüxo.
12 Rü nataãxẽgü i ngẽma nachixü̃ane ya Cori ya Tupanamaxã Tupanaã̱xgüxü̃ rü ngẽma duü̃xü̃gü ya Cori ya Tupana nügüxü̃́ dexü̃.
13 Rü nüma ya Cori ya Tupana rü dauxü̃guxü̃ i naanewa ínadawenü, rü nüxü̃ nadau i guxü̃ma i duü̃xü̃gü.
14 Rü ngẽma dauxü̃guxü̃ i naane i nawa nangexmaxü̃wa nixĩ i tüxü̃ nangugüxü̃ ya yíxema nhama i naanewa ngẽxmagüxe.
15 Rü nüma nixĩ i maxü̃ tüxna naxãxü̃ rü nüxü̃ nadauxü̃ i guxü̃ma i ngẽma taxügüxü̃.
16 Rü taxucüma ya ãẽ̱xgacü ya woo muarü churaraã́cü rü tá nügü ínapoxü̃ ega tama Tupana nüxü̃ rüngü̃xẽẽgu. Rü bai ya wüxi ya yatü ya poraxüchicü rü tá norü poramaxã nügü ínapoxü̃ ega tama Tupana naxü̃tawa ngẽxmagu.
17 Rü woo cowarugü i poraxüchixü̃ rü taxuacüma norü yoraxü̃ ínapoxü̃ ega tama Tupana nüxü̃ rüngü̃xẽẽgu.
18 Notürü nüma ya Cori ya Tupana rü guxü̃guma tüxna nadau ya yíxema nüxü̃ ngechaü̃güxe rü nagu yaxõgüxe.
19 Rü ngẽmaãcü yuwa tüxü̃ ínapoxü̃ rü maxü̃ tüxna naxã ega taiya ínguxgu.
20 Rü Tupanaxü̃taguxicatama nixĩ i nüxü̃ yarüngauxü̃ i tórü maxü̃. Erü nüma rü tüxü̃ narüngü̃xẽẽ rü tüxü̃ ínapoxü̃.
21 Rü ngẽmaca̱x tórü Cori ya Tupanamaxã tataãxẽgü rü aixcuma naéga i üünexü̃gu tayaxõgü.
22 ¡Rü tauxü̃́ i nüxü̃ curüxoxü̃ nax toxü̃ cungechaü̃xü̃, Pa Cori Pa Tupanax! Erü cuma rü tomaxã icuxuneta rü taxũtáma toxü̃ ícuwogü.
