Salmo 34:1-22
Tupanaxü̃ ticua̱xüxü̃ erü tamaxã namecüma
34 Rü guxü̃ i oragu rü Cori ya Tupanamaxã tá mexü̃ chaxuegu, rü chauã̱xmaxã rü guxü̃gutáma nüxü̃ chicua̱xüxü̃.
2 Rü Cori ya Tupanamaxã chaugü chicua̱xüxü̃. ¡Rü nüxü̃́ iperüxĩnüe rü namaxã petaãxẽgü, Pa Duü̃xü̃gü ya Mexü̃gu Rüxĩnüexex!
3 ¡Rü ngĩxã wüxigu nüxü̃ ticua̱xüxü̃gü rü tanatachigaxẽxẽ i naéga!
4 Rü Cori ya Tupanana chaca rü nüma rü choxü̃ nangãxü̃ga, rü choxü̃ ínanguxuchixẽxẽ nawa i guxü̃ma i chorü oégaãẽgü.
5 Rü yíxema Cori ya Tupanagu rüdaunüxe rü guxü̃gutáma tataãxẽgü rü tagutáma ãne tingegü.
6 Rü dama yatü ya ngearü ngẽmaxü̃ã́cü rü Cori ya Tupanana naca rü nüma nüxü̃ naxĩnü rü norü guxchaxü̃güwa ínananguxuchixẽxẽ.
7 Rü Cori ya Tupanaarü orearü ngeruxü̃ i dauxü̃cüã̱x rü tüxna nadau rü tüxü̃ namaxẽxẽ ya yíxema Cori ya Tupanaxü̃ ngechaü̃güxe.
8 ¡Rü nüxü̃ pixü̱x nax ngẽmaãcü nüxü̃ pecuáxü̃ca̱x nax nhuxãcü namecümaxü̃ ya Cori ya Tupana! Rü nataãxẽ ya yimá yatü ya Cori ya Tupanagu yaxõcü.
9 Rü pema i aixcuma Cori ya Tupanaxü̃ ngechaü̃güxe, rü name nixĩ i nüxü̃ pecua̱xüxü̃gü rü naga pexĩnüe. Erü taxuxü̃táma ta̱xacü tüxü̃́ nataxu ya yíxema nüxü̃ ngechaü̃güxe rü naga ĩnüexe.
10 Rü woo ya yimá ai ya porachirécü i nhuxguxacü rü taiya nüxü̃́ nangu̱x. Notürü yíxema aixcuma Cori ya Tupanaga ĩnüexe rü tagutáma tüxü̃́ nataxu i mexü̃.
11 Pa Chauxacügüx ¡nua pexĩ rü choxü̃́ iperüxĩnüe! Rü pexü̃ tá changúexẽxẽ i nhuxãcü Cori ya Tupanaxü̃ nax pecua̱xüü̃güxü̃.
12 ¿Cunawa̱xexü̃ nax cutaãxẽxü̃ rü namáxü̃ i curü maxü̃ i nhama i naanewa?
13 Rü dücax ¡naxuãxẽ rü nüxna nadau ya curü conü rü tauxü̃́ i quidoraxü̃!
14 ¡Rü nüxna ixũgachi i guxü̃ma i chixexü̃ rü mea namaxü̃! ¡Rü naxca̱x nadau nax taxúemaama nax cuguxchaxü̃ã́xü̃ rü ngẽmaãcü namaxü̃!
15 Erü nüma ya Cori ya Tupana rü tüxna nadau ya yíxema aixcuma mea maxẽxe. Rü tüxü̃́ nüxü̃ naxĩnü i tümaarü yumüxẽ.
16 Notürü nüxü̃ naxo i ngẽma chixexü̃ ügüxü̃ rü inayanaxoxẽxẽ i nhama i naanewa nax taxúema nüxna cua̱xãchixü̃ca̱x.
17 Rü nüma ya Cori ya Tupana rü nüxü̃ naxĩnü i norü yumüxẽ ya yimá mecü ya duü̃. Rü guxü̃ma i norü guxchaxü̃güwa rü ínanapoxü̃.
18 Rü nüma ya Cori ya Tupana rü ínamemare nax tüxü̃ nangü̃xẽẽxü̃ ya yíxema tügüca̱x iyarütauxexe. Rü tüxü̃ namaxẽxẽ ya yíxema tümaarü chixexü̃ca̱x tügümaxã ngechaü̃güxe.
19 Rü yimá yatü ya mecü rü nawa nangupetü i muxü̃ma i guxchaxü̃gü. Notürü nüma ya Cori ya Tupana rü nawa ínanapoxü̃ i guxü̃ma i ngẽma.
20 Rü nüma ya Tupana nüxna nadau nax tama yexeraxü̃ i guxchaxü̃gü naxca̱x ínguxü̃ca̱x rü woo naxchina̱xãgü rü nüxna nadau.
21 Rü ngẽma duü̃xü̃ i chixexü̃ ügüxü̃ rü ngẽma norü guxchaxü̃gu tátama nayi. Rü ngẽma tümachi aixü̃ ya yíxema mexü̃ üxe rü Tupana tá nanapoxcu.
22 Notürü nüma ya Cori ya Tupana rü tüxü̃ ínapoxü̃ ya yíxema norü duü̃xü̃gü ixĩgüxe. Rü tama tüxü̃ napoxcue ya yíxema nagu yaxõgüxe.
