Salmo 35:1-28
Yumüxẽ i nawa Tupanaarü ngü̃xẽẽca̱x íca̱xaxü̃
35 Pa Cori Pa Tupanax ¡naxca̱x íyaxüãchi i ngẽma cha̱u̱xca̱x yaxüãchixü̃ rü nadai i ngẽma choxü̃ ima̱xgüchaü̃xü̃!
2 ¡Rü ẽcü nayaxu i curü poxü̃ruxü̃ rü nua naxũ rü choxü̃ rüngü̃xẽxẽ!
3 ¡Rü nhu̱xmax rü nayaxu ya cuxne nax namaxã cunadaixü̃ca̱x i ngẽma chawe ingẽxü̃tanüxü̃! ¡Rü chamaxã nüxü̃ ixu nax cuma yixĩxü̃ i choxü̃ cumaxẽẽxü̃!
4 ¡Rü yabuxmüxẽxẽ i ngẽma choxü̃ ima̱xgüchaü̃xü̃! ¡Rü yabuxmüxẽxẽ rü naxãneexẽxẽ i ngẽma choxü̃ chixexẽẽgüchaü̃xü̃!
5 ¡Rü namu i curü orearü ngeruxü̃ i dauxü̃cüã̱x nax ínawoxü̃ãxü̃ca̱x nhama buanecü arúchuchirexü̃ ngianexẽẽxü̃rüxü̃!
6 ¡Rü ngẽma namaxü̃ i chorü uanügü rü naxẽanexẽxẽ rü nacoraxẽxẽ i namaxü̃! Rü chanaxwa̱xe i curü orearü ngeruxü̃ i dauxü̃cüã̱x nawe ningẽchigü.
7 Rü woo taxuxü̃ma i chixexü̃ chaxüyane rü nümagü rü chixexü̃gu choxü̃ nanguxẽẽgüchaü̃. Rü woo taxuxü̃ma i chixexü̃ chaxüyane rü nümagü rü bexma nanaxügü i wüxi i ãxmaxü̃ nax ngẽmagu chingucuchixü̃ca̱x.
8 ¡Rü ẽcü ngürüãchi chixexü̃gu nayixẽxẽ nax ngẽma nümatama namexẽẽgüxü̃ i ãxmaxü̃gu nayi̱xü̃ca̱x rü ngẽmaãcü nagu yanachixexü̃ca̱x!
9 Notürü i chamax rü Cori ya Tupanamaxã tá chataãxẽ erü choxü̃ ínapoxü̃.
10 Rü guxü̃ma i chorü maxü̃maxã rü nhacharügü tá: “¿Texé cumaxã tawüxigu, Pa Cori Pa Tupanax? Erü yíxema ngearü diẽruã̱xgüxe rü tüxü̃́ nataxu i ngẽmaxü̃gü, rü cuma rü tüxü̃ ícupoxü̃ nüxna i ngẽma tüxü̃ rüporamaegüxü̃ rü ngẽma chixri tümaarü puracü ütanügüxü̃”, nhachagürü.
11 Rü nhu̱xmax rü inachigü i duü̃xü̃gü i chauchiga doraxü̃ ixugüxü̃. Rü choxna naxca̱x nacagüe i ta̱xacü i chama tama nüxü̃ chacuáxü̃.
12 Rü ngẽma duü̃xü̃gü rü yema mexü̃ ga naxca̱x chaxüxü̃ rü chixexü̃maxã choxü̃́ nanatáeguxẽẽgü. Rü ngẽma nixĩ i poraãcü ngechaü̃ choxna ãxü̃.
13 Rü yexguma nümagü yada̱xaweegu rü chama rü naxca̱x chaxoégaãxẽ rü naxchiru ga témümarexü̃gu chicu̱x. Rü tama chachibüãcüma guxü̃guma naxca̱x chayumüxẽ.
14 Rü chama rü naxca̱x changechaü̃ rü nhama chaué yuxü̃rüxü̃ rüe̱xna wüxi i chamücü rüe̱xna chauenexẽ yuxü̃rüxü̃ chixĩ.
15 Notürü yexguma guxchaxü̃ cha̱u̱xca̱x ínguxgu ga chamax rü nümagü rü naxĩtaque̱xe rü choxü̃ nacugüe nhama tama choxü̃ nacua̱xgüxü̃rüxü̃. Rü yemaacü chixexü̃maxã choxü̃ nixugüecha.
16 Rü ngúxü̃ choxü̃ ningexẽẽgü rü choxü̃ nacugüe rü numaxã choxna nadaugü. Rü yemaacü chauxchi naxaie.
17 Pa Cori Pa Tupanax ¿nhuxguxüratáta i nüxü̃ curüchauxü̃ nax ngẽ́ma nüxü̃ cudawenümarexü̃ i ngẽma duü̃xü̃gü i nhama aigürüxü̃ cha̱u̱xca̱x inginetanücüüxü̃? ¡Rü nüxna choxü̃ ínapoxü̃ nax tama choxna nayauxgüãxü̃ca̱x i ngẽma nügümaxã choxü̃́ wüxicaxü̃ i chorü maxü̃!
18 Rü nhu̱xũchi i chama rü tá moxẽ cuxna chaxã nape̱xewa i ngẽma muxũchixü̃ i curü duü̃xü̃gü. Rü guxü̃ma i ngẽma duü̃xü̃güpe̱xewa rü tá cuxü̃ chicua̱xüxü̃.
19 Rü tama chanaxwa̱xe i chauchigagu nataãxẽgü i ngẽma chorü uanügü. Rü tama chanaxwa̱xe nax choxna nanuxetügüxü̃ i ngẽma duü̃xü̃gü i chauxchi aiexü̃ woo taxuxü̃ma chaxüyane.
20 Rü nümagü rü tama ngüxmüeca̱x nadaugü. Notürü ngẽma naxca̱x nadaugüxü̃ nixĩ nax tümaechitawa̱xegüxü̃ ya yíxema nhaa nachixü̃anewa mexü̃gu rüxĩnüexe.
21 Rü poraãcü nichogü chixexü̃ i chauchigamaxã rü nhanagürügü: “Dücax, toxetüxüchimaxã cuxü̃ tadau nax chixexü̃ cuxüxü̃”, nhanagürügü.
22 Pa Corix, cuma rü meama nüxü̃ cucua̱x i ngẽma naxügüxü̃ i ngẽma duü̃xü̃gü. ¡Rü tauxü̃́ i choxna cuyáxü̃guxü̃!
23 Pa Corix, Pa Chorü Tupanax ¡naba̱i̱xãchi rü inachi rü chauétüwa nachogü!
24 Pa Corix, Pa Chorü Tupanax, cuma nax mecü quixĩxü̃ ¡rü choxü̃ nangugü! Erü tama chanaxwa̱xe i choxü̃ nax nacugüexü̃ i chorü uanügü.
25 Rü tama chanaxwa̱xe i chauchiga nidexagü rü chauchiga chixexü̃gu narüxĩnüe nhaxü̃maxã: “Nhaa nixĩ i ngẽma inaxwa̱xegüxü̃ rü düxwa marü chixexü̃gu tananguxẽxẽ”, nhanagürügü.
26 Rü nhu̱xmax chanaxwa̱xe i ãne ningegü i ngẽma duü̃xü̃gü i taãxẽgüxü̃ naxca̱x nax chixexü̃gu changuxü̃. Rü chanaxwa̱xe i guxü̃wama ãne ningegü i ngẽma nügü ixugüexü̃ nax choxü̃ nayexeragüxü̃.
27 Notürü yíxema naxwa̱xegüxe nax chorü uanügüxü̃ charüporamaegüxü̃, rü name nixĩ i taãxẽãcü guxü̃guma tagaãcü nhatarügügü: “Nüma ya Cori ya Tupana rü namecümaxü̃chi. Rü namaxã nataãxẽ i ngẽxguma norü duü̃xü̃ mexü̃ nüxü̃ ngupetügu”, nhatarügügü.
28 Rü chama rü chorü conümaxã tá nüxü̃ chixuchiga i nhuxãcü ãẽ̱xgacü ya mecü nax quixĩxü̃. Rü guxü̃ i ngunexü̃gu tá cuxü̃ chicua̱xüxü̃.
