Salmo 36:1-12
Duü̃xü̃gü rü guxü̃wama nachixe notürü Tupana rü guxü̃guma namecüma
36 Rü ngẽma duü̃xü̃ i tama Tupanaga ĩnüxü̃ rü ngẽma pecádu nixĩ i norü ĩnüwa nüxü̃́ nangúchaü̃xẽẽxü̃ nax chixexü̃ naxüxü̃ca̱x. Rü ngẽmaca̱x taguma nagu narüxĩnü nax Tupanaxü̃ namuü̃xü̃.
2 Rü nügügu narüxĩnü nax namexü̃ i ngẽma chixexü̃ i naxüxü̃ rü ngẽmamaxã nügü nicua̱xüxü̃.
3 Rü ngẽma duü̃xü̃ i chixexü̃ rü ngẽxguma yadexagu rü taguma mexü̃ i orexü̃ nixu rü doraxü̃xicatama nixu. Rü wüxi i duü̃xü̃ i tama naãxẽxü̃ cuáxü̃ nixĩ, rü taguma mexü̃ naxü.
4 Rü ngẽxguma norü pechicaxü̃gu nacaxgu rü ngẽ́ma nagu narüxĩnü nax chixexü̃ naxüxü̃. Rü ngẽma nax poraãcü nüxü̃́ nangúchaü̃ i ngẽma chixexü̃ i naxüxü̃ rü ngẽmaca̱x tama ínanangéxchaü̃.
5 Notürü i ngẽma curü ngechaü̃, Pa Cori Pa Tupanax, rü dauxü̃guxü̃ i naanewa nangu. Rü ngẽma nax quixaixcumaxü̃ rü ya̱u̱xtüweanexü̃arü yexerawa nangu.
6 Rü ngẽma nax mea guxü̃maxã icucuáxü̃ rü nanaxa̱ixrügumaraxü̃, nhama ma̱xpǘnegü ya taxü̃negürüxü̃. Rü ngẽma curü mugü rü guxü̃guca̱x nixĩ nhama már i taxü̃ rü mátamaxü̃chixü̃rüxü̃. Rü cumax, Pa Cori Pa Tupanax, rü nüxna cudau i guxü̃ma i duü̃xü̃gü rü naexü̃gü.
7 Rü ngẽma curü ngechaü̃, Pa Tupanax, rü namexechi. Rü ngẽmaca̱x i duü̃xü̃gü rü cupe̱xátütüxü̃ca̱x nibuxmü nax ícupoxü̃xü̃ca̱x.
8 Rü cuma rü duü̃xü̃güna cunaxã i nawemü i mexü̃ rü natü i mexü̃wa cuyaxaxegüxẽxẽ. Rü ngẽmaãcü meama nüxü̃́ ningu.
9 Rü aixcuma cuwa nangexma i maxü̃ rü cuma nixĩ i toxca̱x cunangóonexẽẽxü̃.
10 Rü ngẽma curü duü̃xü̃gü i cuxü̃ cua̱xgüxü̃ rü cuga ĩnüexü̃, rü cuma rü nüxü̃ cungechaü̃ rü mea namaxã icucua̱x.
11 ¡Notürü tauxü̃́ i cunaxüchicaxü̃ i chauétü nax nachigüxü̃ i ngẽma nügü icua̱xüü̃güxü̃ rü bai i choxü̃ nax ínata̱xüchigüxü̃ i ngẽma tama cuga ĩnüexü̃!
12 Dücax, marü ngẽxma nayayitanü i ngẽma chixexü̃arü üruü̃gü. Nayayitanü rü marü taxucürüwa inachigü.