Salmo 38:1-22
Yumüxẽ i Tupanaarü ngü̃xẽẽca̱x íica̱xü̃
38 Pa Cori Pa Tupanax ¡tauxü̃́ i choxü̃ cuxüáxü̃ ega chaugagu cunuxgu! ¡Rü tauxü̃́ i choxü̃ cupoxcuxü̃ i curü numaxã!
2 Rü yimá cuxne rü chawa narüwa̱xgü rü cuxme̱xmaxã choxü̃ quima̱x.
3 Rü ngẽma chorü chixexü̃gagu nixĩ i chamaxã cunuxü̃. Rü ngẽmaca̱x i nhaa chaxune rü guxü̃wama nida̱xawe rü bai ya wüxi ya chauxchina̱xã ya mexü̃ne.
4 Rü ngẽma chorü chixexü̃gü rü chauétüwa nangu rü choxü̃ narüyexera rü taxucürüwama namaxã chapora.
5 Rü ngẽma tama chauãẽxü̃ nax chacuáxü̃gagu rü chorü o̱xri rü niyixi rü naxãxü̃chixü.
6 Rü guxü̃ma i ngunexü̃gu rü changechaü̃ rü chamá rü chanaxi̱xãchiãxẽ.
7 Rü cha̱u̱xca̱xwe rü niyauca erü chixaxüne. Rü guxü̃wama i chaxunewa rü chida̱xawe.
8 Rü chaxune rü nhama inapoexü̃rüxü̃ nixĩ erü chipaxüchi rü changearü poraã̱x. Rü ngẽma nax chixãĩnecüüxü̃ rü aixcuma nixĩ erü poraãcü choxü̃́ nangu̱xuchi.
9 Pa Cori Pa Tupanax, cuma rü meama nüxü̃ cucua̱x i guxü̃ma i chorü ngúchaü̃gü. Rü ngẽma nax yaxna charüngü̃xü̃ rü cuma nüxü̃ cucuáchiga nax ta̱xacüca̱x ngẽmaãcü chixĩxü̃.
10 Rü chorü maxü̃ne rü poraãcü nixĩã̱xcüxü rü ngẽma chorü pora rü nigúchigü. Rü woo ya yima chauxetü rü marü taxuxü̃ma nadau.
11 Rü ngẽma chamücüxüchi ixĩgüxü̃ rü woo i ngẽma chautanüxü̃gü rü choxna nayáxü̃gugü naxcha̱xwa i ngẽma chorü o̱xrigü.
12 Rü ngẽma choxü̃ ima̱xgüchaü̃xü̃ rü chape̱xegu nananu i norü yaxruü̃gü. Rü ngẽma choxü̃ chixexẽẽchaü̃güxü̃ rü nügümaxã nidexagü nax nhuxãcü choxü̃ iyanaxoxẽẽgüxü̃ca̱x. Rü guxü̃ i oragu rü nagu narüxĩnüe nax nachauechitaegüchaü̃xü̃.
13 Notürü i chama rü chaugü changauchi̱xẽnetaxẽẽmare rü nhama tama nüxü̃ chaxĩnüxü̃rüxü̃ chixĩ. Rü nhama ngeáxü̃rüxü̃ taguma chidexa.
14 Rü wüxi i ngauchi̱xẽxü̃ i taxuxü̃ma ixuxü̃ nax nügü ínapoxü̃xü̃ca̱xrüxü̃ chaugü chixĩxẽxẽ.
15 Pa Cori Pa Chorü Tupanax, rü curü ngü̃xẽẽ nixĩ i ngẽma chanaxwa̱xexü̃. Rü chanaxwa̱xe nax cuma yixĩxü̃ i cunangãxü̃xü̃ i ngẽma chorü uanügü.
16 Rü ngẽma cuxna naxca̱x chaca̱xü̃ nixĩ nax tama choxü̃ nacugüexü̃ rü nataãxẽgüxü̃ i chorü uanügü i ngẽxguma guxchaxü̃gu changuxchaü̃gu.
17 Rü aixcuma nixĩ nax marü ichayanguxchaü̃xü̃. Rü ngẽma nax choxü̃́ nangúxü̃ rü taguma choxü̃ narüna.
18 Rü nhu̱xmax, Pa Tupanax, rü cumaxã nüxü̃ chixu i ngẽma chorü pecádugü erü naxca̱x chaugü íchicua̱x ga yema chixexü̃ ga chaxüxü̃.
19 Rü ngẽma chorü uanügü rü nimuetanü rü ngẽmaca̱x namuxũchi i ngẽma notüca̱xma chauxchi aiexü̃.
20 Rü ngẽxguma mexü̃ naxca̱x chaxü̱xgux rü chixexü̃maxã choxü̃́ nanaxütanügü. Rü ngẽxguma naxca̱x chada̱xgux nax mexü̃ chaxüxü̃ rü nümagü rü chamaxã nanue.
21 Pa Corix ¡tauxü̃́ i chaxica nua choxü̃ cutáxü̃! Pa Chorü Tupanax ¡rü tauxü̃́ i choxna quixũgachixü̃!
22 Pa Tupana ya Chorü Maxẽẽruxü̃ Ixĩcüx ¡paxa nua naxũ rü choxü̃ yarüngü̃xẽxẽ!
