Salmo 39:1-13
Maxü̃ rü paxa nagu̱x
39 Chama rü marü chaugümaxã nhachagürü: “Chaugüna tá chadau nax ngẽmaãcü tama chixexü̃ chaxüxü̃ca̱x i ngẽxguma chidexa̱xgu. Rü tá changea̱xmare i ngẽxguma chape̱xewa nangexmagügu i ngẽma duü̃xü̃gü i chixexü̃gu rüxĩnüexü̃”, nhachagürü.
2 Rü wüxi ga tama idexaxü̃rüxü̃ chaugü chixĩxẽxẽ. Rü taxuxü̃ma chixu rü bai ga wüxi ga dexa ga mexü̃xü̃ chixu. Notürü yema choxü̃́ ngúxü̃ rü yexeraãcü ningúchigü.
3 Rü poraãcü chauãẽwa nangu̱x i ngẽma choxü̃ üpetüxü̃. Rü yexguma yexeraãcü nagu charüxĩnügu rü yexeraãcü chanuãxẽ. Rü yemaca̱x düxwa tagaãcü nhachagürü:
4 “Pa Cori Pa Tupanax ¡choxü̃ nüxü̃ nacua̱xẽxẽ nax ngexta tá yacuáxü̃ i chorü maxü̃ rü nhuxre i ngunexü̃ tá choxü̃́ ngẽxmaxü̃! ¡Rü choxü̃ nüxü̃ nacua̱xẽxẽ nax nhuxãcü nanuxũxü̃ i nhaa chorü maxü̃!
5 Erü nhaa maxü̃ i choxna cuxãxü̃ rü aixcuma nanuxu. Rü cupe̱xewa rü wüxi i paxaãchiruü̃mare nixĩ. Rü wüxichigü i duü̃xü̃arü maxü̃ rü nhama wüxi i ngü̃ãcüürüxü̃ nixĩ.
6 Rü wüxichigüarü maxü̃ rü nhama wüxi i ga̱u̱xchipeta i ngupetüxü̃rüxü̃ nixĩ. Rü notüca̱xma nananutaque̱xe i norü ngẽmaxü̃gü, notürü tama nüxü̃ nacua̱x i texéarü tá yixĩxü̃ i nawena.
7 Rü ngẽmaca̱x, Pa Corix ¿rü ta̱xacü chi i to i íchayangu̱xẽẽxü̃? Erü cuma nixĩ i choxna cunaxãxü̃ i nhaa chorü maxü̃.
8 ¡Rü choxü̃ ínanguxuchixẽxẽ nawa i chorü pecádugü! ¡Rü tauxü̃́ i nüxü̃́ cunatauxchaxẽẽxü̃ i ngẽma chixearü ĩnüã́xü̃ i duü̃xü̃gü nax choxü̃ nacugüexü̃!
9 Pa Corix, cupe̱xewa rü changeã̱x rü taxu nhachagürü, erü cuma nixĩ i cunaxüxü̃ i nhaa chorü maxü̃.
10 ¡Rü marütama nax choxü̃ quimáxü̃! Erü nhaa curü ma̱xmaxã rü tá chayu.
11 Rü cuma rü ngẽxguma norü chixexü̃gagu cunapoxcu̱xgux i wüxi i duü̃xü̃, rü ngẽmaãcü ícuyanawe̱xãchixẽxẽ. Rü ngẽma yexeraãcü nüxü̃ cungechaü̃xü̃ rü aixcumama cuyanawe̱xãchixẽxẽ. Rü wüxichigü i duü̃xü̃ rü nhama wüxi i ngü̃ãcüürüxü̃ nixĩ i norü maxü̃.
12 Pa Cori Pa Tupanax ¡choxü̃́ nüxü̃ naxĩnü i chorü yumüxẽ! ¡Rü irüxĩnü nax nhuxãcü auxãcü cumaxã chidexaxü̃! ¡Rü tauxü̃́ i cungeã̱xmarexü̃ naxca̱x i chorü axu! Chama rü cupe̱xewa rü nhama wüxi i duü̃xü̃ i tama curü duü̃xü̃ ixĩxü̃rüxü̃ chixĩ. Rü chorü o̱xigürüxü̃ rü wüxi i paxaãchimare nhama i naanewa ngẽxmaxe chixĩ.
13 Pa Corix ¡tauxü̃́ i yumaxã choxü̃ cupoxcuxü̃! ¡Rü cha̱u̱xca̱x yataanexẽxẽ nax wena chataãxẽxü̃ca̱x naxü̃pa nax chayuxü̃!” nhachagürü.