Salmo 4:1-8
Aixcuma Cori ya Tupanagu tayaxõgü
4 Pa Chorü Poxü̃ruxü̃x, Pa Tupanax ¡rü choxü̃ nangãxü̃ ega cuxna chaca̱xgu! Rü cuma rü ngẽxguma ngúxü̃ chingexgu, rü cuma nixĩ i choxü̃ cutaãxẽxẽẽxü̃. ¡Rü cuxü̃́ changechaxü̃tümüxü̃ rü choxü̃́ nüxü̃ naxĩnü i chorü yumüxẽ!
2 Rü pema nax pegü pecua̱xüü̃güxü̃ ¿rü nhuxguxüratáta i nüxü̃ perüxoexü̃ nax choxü̃ picugüexü̃ rü ãne choxü̃ pingexẽẽxü̃? ¿Rü nhuxguxüratáta i nüxna pexĩgachixü̃ nax nagu pemaxẽxü̃ i pecümagü i chixexü̃ i taxuwama mexü̃ rü notüca̱xmamare ixĩxü̃?
3 Rü dücax, rü nüma ya Cori rü aixcuma natümawa̱xe ya yíxema duü̃xẽ ya aixcuma naga ĩnüxe. Rü nüma rü choxü̃ naxĩnü ega nüxna chaca̱xgux.
4 ¡Rü nüxü̃ pemuü̃eãcüma nüxü̃́ iperüxĩnüe, rü marütama nax chixexü̃ pexügüxü̃! Rü ngẽxguma ipeyacaxãchitanügu i pexchiãxü̃wa ¡rü peãxẽwa pegü pengugü nax nhuxãcü yixĩxü̃ i perü maxü̃ i Tupanape̱xewa!
5 ¡Rü Tupanana penaxã i ngẽma ãmaregü i nüma aixcuma namaxã nataãxẽxü̃, rü guxü̃guma nagu peyaxõgü!
6 Rü muxü̃ma i duü̃xü̃gü rü nhanagürügü: “¿Texé tá tüxü̃ tarüngü̃xẽxẽ?” nhanagürügü. Pa Corix ¡cuxü̃́ tangechaü̃tümüxü̃ãcüma toxü̃ nadawenü rü toxü̃ rüngü̃xẽxẽ!
7 Cuma rü taãxẽ choxna cuxã i norü yexera i ngẽma duü̃xü̃gü i muxü̃ma i trígu rü wíũ nüxü̃́ ngẽxmagüxü̃.
8 Chama rü taãxẽãcü ichayacaãchi rü ngẽxgumatama mea chape, erü nüxü̃ chacua̱x, Pa Corix, nax cuma rü choxna cudauxü̃.