Salmo 40:1-17
Chorü taãxẽmaxã chanaxü i curü ngúchaü̃, Pa Chorü Tupanax
40 Rü chama rü yaxna chaxĩnüãcüma íchanangu̱xẽxẽ nax Tupana choxü̃ rüngü̃xẽẽxü̃. Rü nüma rü choxü̃ naxĩnü ga yema nüxna nax chaca̱xaxü̃.
2 Rü yuwa choxü̃ ínanguxuchixẽxẽ. Rü ngẽxguma ngẽma ãcharaanexü̃gu changuchaü̃gu rü taianexü̃waama choxü̃ nagagachi nax íchixũxü̃ca̱x.
3 Rü wüxi i ngexwaca̱xü̃xü̃ i wiyae chauã̱xwa nanguxẽxẽ nax ngẽmamaxã nüxü̃ chicua̱xüüxü̃ca̱x. Rü muxema ga yema wiyaexü̃ taxĩnüegu rü tataãxẽgü rü Cori ya Tupanaxü̃ tamuü̃e rü nagu tayaxõgü.
4 Rü tataãxẽgü ya yíxema Cori ya Tupanagu yaxṍxe, rü tama ngẽma chixexü̃ ügüxü̃xü̃tagu naxca̱x dauxe i tümaarü ngü̃xẽẽ rü tama ngẽma tupananetachicüna̱xãgüxü̃ icua̱xüü̃güxe.
5 Pa Cori Pa Chorü Tupanax, rü namuxũchima nixĩ ga yema mexü̃gü ga curü poramaxã toxca̱x cuxüxü̃. Rü cuma rü guxü̃guma togu curüxĩnü rü taxúema cumaxã tawüxigu. Rü ngẽma toxca̱x cuxüxü̃ rü ngẽma togu nax curüxĩnüxü̃ rü chanaxunagüchaü̃, notürü namuxũchi i ngẽma rü ngẽmaca̱x taxucürüwama nüxü̃ chixu i guxü̃ma.
6 Cuma rü tama namaxã cutaãxẽ nax duü̃xü̃gü cuxca̱x nadaixü̃ rü yagugüãxü̃ i wocaxacügü rü carnérugü. Rü woo i ngẽma ãmaregü i chawüarü rü tríguarü rü chewádaarü rü tama namaxã cutaãxẽ. Rü tama naxca̱x ícuca nax ãmaregü cuxca̱x yagugüxü̃ i duü̃xü̃gü nax ngẽmaãcü norü chixexü̃xü̃ curüngümaxü̃ca̱x. Notürü ngẽma cuma cunaxwa̱xexü̃ nixĩ nax guxü̃guma cuga chaxĩnüxü̃ rü cuxna chanaxãxü̃ i chorü maxü̃.
7 Rü ngẽmaca̱x cumaxã nüxü̃ chixu rü daxe chixĩ rü chaugü ichaxã yema curü orearü uruü̃gü curü orewa naxümatüxü̃rüxü̃.
8 Rü chamax, Pa Chorü Tupanax, rü namaxã chataãxẽ nax curü ngúchaü̃ chaxüxü̃. Rü chauãẽgu namaxã changuxü̃ i ngẽma curü ngu̱xẽẽtae.
9 Rü ngẽma muxü̃ i curü duü̃xü̃güpe̱xewa chanaxunagü i curü ore i aixcuma ixĩxü̃. Cumax rü meama nüxü̃ cucua̱x nax marü namaxã nüxü̃ chixuxü̃.
10 Rü tama chaugügu chayacu̱x nax nhuxãcü aixcuma namexü̃ i ngẽma cuxüxü̃. Rü marü namaxã nüxü̃ chixu nax nhuxãcü cuyanguxẽẽxü̃ i ngẽma nüxü̃ quixuxü̃ rü nhuxãcü toxü̃ cumaxẽxẽẽxü̃. Rü ngẽxgumarüxü̃ ta rü marü tama ichayacu̱x nax nüxü̃ chixuxü̃ nax aixcuma cuxü̃́ nangechaü̃tümüxü̃güxü̃ i ngẽma muxũchixü̃ i curü duü̃xü̃gü.
11 Rü nhu̱xmax, Pa Corix, rü tama chanaxwa̱xe nax nüxü̃ curüchauxü̃ nax cuxü̃́ changechaü̃tümüxü̃xü̃. Erü ngẽma curü ngechaü̃ rü curü ore i aixcuma ixĩxü̃icatama nixĩ i chorü poxü̃ruxü̃ ixĩxü̃.
12 Rü ngẽma chixexü̃gü i choxü̃ ngupetüxü̃ rü namuxũchi, rü düxwa taxucürüwama chayaxugü. Rü ngẽma choxrütama chixexü̃gügu changu rü ngẽmagagu taxucürüwa cuxü̃ chadawenü. Erü ngẽma chorü chixexü̃gü rü chauyáexü̃ narümumae rü ngẽmagagu cuxü̃ charüxochigü.
13 Pa Corix, cuxü̃ chaca̱a̱xü̃ ¡rü choxü̃ ínanguxuchixẽxẽ nawa i ngẽma chorü chixexü̃gü rü paxa choxü̃ rüngü̃xẽxẽ!
14 40:14-15 Rü ngẽxgumarüxü̃ ta, Pa Corix, rü chanaxwa̱xe i cunaxãneexẽxẽ i ngẽma chorü uanügü i choxü̃ ima̱xgüchaü̃xü̃. Rü name nixĩ nax norü ãnemaxã cuyabuxmüxẽẽxü̃ i ngẽma duü̃xü̃gü i chixexü̃ chamaxã ügüchaü̃xü̃ rü nhu̱xmax choxü̃ cugüexü̃.
15 Nüü̃ nadau 40:14
16 Notürü guxãma ya yíxema cuxca̱x daugüxe rü name nixĩ nax poraãcü tataãxẽgüxü̃. Rü guxãma ya yíxema tüxü̃́ nangúchaü̃güxe nax tüxü̃ cumaxẽxẽẽxü̃ rü name nixĩ i guxü̃guma nhatarügügü: “¡Cori ya Tupanaxü̃ pecua̱xüxü̃gü erü guxãétüwa nangexma!” nhatarügügü.
17 Rü chama nax taxuxü̃ma chixĩxü̃ rü chanaxi̱xãchiãẽxü̃ ¡rü tauxü̃́ i choxü̃ curüngümaxü̃, Pa Corix! Erü cuma nixĩ i choxü̃ curüngü̃xẽẽxü̃ rü choxü̃ ícupoxü̃xü̃. Rü ngẽmaca̱x, Pa Chorü Tupanax ¡rü tauxü̃́ i cunũxcüãẽxü̃ nax choxü̃ curüngü̃xẽẽxü̃!
